Өрөспүүбүлүкэ түһүлгэлэриттэн сонуннар

410

ТААТТА ИННИКИ ЭРЭЛЛЭРЭ-ВЕРШИНИН, АНДРОСОВ, ТАТАРИНОВ …

Алтынньы 14 күнүгэр Дьокуускай куорат «Юность» манеһыгар атах оонньуутугар улууска бастакы РСФСР, Саха АССР спордун маастара Гаврил Григорьев кэриэһигэр ХХII өрөспүүбүлүкэ таһымнаах күрэхтэһии буолан ааста. Тэрийээччилэринэн буоллулар: СӨ атах оонньуутугар Федерацията, «Модун» спорт национальнай көрүҥнэрин Киинэ, «Таатта улууһа» МО спортка отдела, Г.Г.Григорьев чугас дьоно, аймахтара. Турнир аһыллыытыгар СӨ атах оонньуутугар Федерациятын салайааччыта, Ил Түмэн Мунньаҕын бэрэссэдээтэлин солбуйааччы Анатолий Добрянцев, «Модун» Киин дириэктэрэ, Ил Түмэн депутата Иннокентий Григорьев, «Таатта улууһа» МО баһылыгын солбуйааччы Изабелла Сивцева, улуус спордун салайааччы Гаврил Вырдылин, кылаабынай судьуйа Евгений Иванов эҕэрдэлэрин тириэртилэр, спортсменнарга ситиһиилэри баҕардылар.

Гаврил Григорьев турнира урут куруутун сыл саҕаланыытыгар ыытыллара, кэлин сылларга күһүн ыытыллар буолла. Уу суола сабыллыан иннинэ, сайыҥҥы-күһүҥҥү сезону түмүктүүр, кыһыҥҥыны саҕалыыр курдук ыытыллара эмиэ үчүгэйгэ дылы. Быйылгы күрэхтэһиигэ Саха сирин 11 улууһуттан уонна Дьокуускай куорат үөрэҕин тэрилтэлэриттэн 64 атах оонньооччу ыстанар сиэктэргэ таҕыста, онтон 22-рэ СӨ спордун маастардара. Турнир аҕыс туоска ыытылынна. Эр дьоҥҥо бастакы миэстэни сүрүннээн быйылгы «Манчаары оонньууларын» кыайыылаахтара Иван Пестряков (Уус Алдан) уонна Кай Адамов (Чурапчы) былдьастылар. Онуоха сааһынан аҕата, уопуттааҕа Иван Пестряков хас көрүҥ аайы киһитин аҕыйахтыы сантиметрынан аһарыта түһэн наар инники сырытта. Уопсай түмүккэ 30м 56см кылыйан, 29м 62см ыстаҥалаан, 24м 56см куобахтаан, барыта 84м 74см хомуйан бастаан таҕыста. Киниттэн 57см хаалан Кай Адамов иккис миэстэни ылла. Үһүс миэстэ иһин спорт маастардара Яков Дмитриев (ШВСМ), Дмитрий Вершинин (Таатта-ХИФУ), Мичил Яковлев (Чурапчы), Сергей Захаров (М-Хаҥалас) кытаанахтык кииристилэр уонна суруллубут бэрээдэктэринэн таҕыстылар. Дмитрий Вершинин көрдөрүүтэ – 81м 08см (28м 65см+27м 91см+24м 52см).

Ааспыт «Манчаары оонньууларын» куобахха кыайыылааҕа, спорт маастара Андрей Васильев (Таатта-Дьокуускай), Чурапчы уола Мичил Яковлевка хотторон үрүҥ көмүс мэтээли кэттэ. Хас ыстаныы аайы сыыйа эбэр Андрейга аҕыс туос кылгас спринт курдук, онон уһун классическай 12 туоска кэлин син биир кыайталыаҕа диэн эрэнэбит. Уолаттарга кыайыылаахтарынан буоллулар: Илья Яковлев (ДьПК), Сергей Собакин (Чурапчы), Дима Дмитриев (М-Хаҥалас). Кэрэ аҥаардарга Любовь Унарова (Дьокуускай), Айыына Салышева (У-Алдан), Юлия Кобякова (ХИФУ) инники бириистээх миэстэлэргэ таҕыстылар. Күрэхтэһии кылаабынай судьуйатынан үлэлээбит Евгений Иванов бэлэмнээбит, дьарыктыыр уолаттара Алгыс Монастырев уонна Айсен Сусов бэйэлэрин кыахтарынан киирсэн ортоку буоллулар. Уолаттар саастара эдэр, онон барыта иннилэригэр. Кыайыылаахтар бары мэтээлинэн, дипломунан уонна үөһээ ахтыллыбыт тэрийээччилэр, Гаврил Григорьев төрөппүт оҕолоро, быраата, «Аллан» маҕаһыын дириэктэрэ Никита Винокуров, «Баай Ас» СХПК (дир.Андросов С.Н) олохтообут сыаналаах бириистэринэн бэлиэтэннилэр.

Эмиэ бу кэмҥэ СӨ мас тардыһыыга Федерациятын, «Модун» спорт национальнай көрүҥнэрин Киинин тэрийиитинэн, сылын аайы ыытыллар «Саҥа ааттар» күрэхтэһии, Манчаары аатынан спорткомплекс киэҥ уораҕайыгар буолан ааста. Саха сирин кэнники көлүөнэ аатырбыт-суолурбут улахан маастардара үксүлэрэ бу күрэхтэһии иһинэн ааһан, манна кыайан-хотон кыаҕыран улахан ситиһиилэргэ тиийбиттэрэ. Онон быйыл даҕаны элбэх эдэр мадьынылар, үксүлэрэ саҥа үөрэххэ киирбит ыччаттар күүстэрин холостулар, ким бэрдин быһаарыстылар.

Таатта мас тардыһыыга оскуолатын ааспыт уолаттар уонна кыргыттар эмиэ боруобалаһан көрдүлэр. Кинилэртэн Үөһээ Бүлүүгэ ыытыллыбыт Спартакиада дьоруойдара Василий Андросов уонна Никита Татаринов (иккиэн Ы-Күөллэр) 65 кг, 80 кг ыйааһыннарга бастааннар биир дойдулаахтарын үөртүлэр. Өссө үһүс кыһыл көмүс мэтээли Уус Тааттаттан төрүттээх Виолетта Колодезникова аҕалан, төрөөбүт улуустарын дорҕоонноохтук ааттаттылар. Үс кыһыл көмүскэ, Баайаҕа ыччата Константин Жирков 70 кг ыйааһыҥҥа иккис миэстэҕэ тахсан, үрүҥ көмүс мэтээли эбэн биэрдэ. Онон убайдарын-эдьиийдэрин ситиһиилэрин салгыыр, өссө тупсарар ыччаттар баалларын, тахсан эрэллэрин биһирии көрдүбүт-иһиттибит. Уолаттарга атын ыйааһыннарга бастаатылар: 60 кг Леонид Нохсоров (Амма), 70 кг Дьулустаан Аркадьев (ХИФУ), 75 кг Семен Ануфриев (ЧГИФКиС), 90 кг Дмитрий Макеев (Дьокуускай, Модун).
Түмүккэ дуобат сонунун кытта билсэн ааһыаҕыҥ. Алтынньы 19-29 күннэригэр Санкт Петербург куоракка нуучча дуобатыгар эр дьоҥҥо ХХХ-с, дьахталларга ХV-с Аан дойду чөмпүйүнээттэрэ саҕаланнылар. Эр дьоҥҥо аан дойдутааҕы гроссмейстердар, Аан дойду 7 төгүллээх чөмпүйүөнэ Гаврил Колесов, Аан дойду 4 төгүллээх кыайыылааҕа Николай Стручков, уолаттарга Аан дойду чөмпүйүөнэ, биир дойдулаахпыт Николай Гуляев киэҥ нэлэмэн Арассыыйа чиэһин көмүскүөхтэрэ. Саха сирин өркөн өйдөөх, ньургун уолаттарыгар үрдүк ситиһиилэри баҕарыаҕыҥ!

Анатолий Мурунов.

Поделиться: