Улуустааҕы комплекснай Спартакиада бүтэрэ чугаһаата

304

ЧӨРКӨӨХХӨ ВОЛЕЙБОЛ КҮРЭҔЭ УОННА БАСТАКЫ МААСТАР

Улуустааҕы комплекснай Спартакиада күһүҥҥү чааһа саҕаланна. Ааспыт өрөбүллэргэ кырдьаҕас Чөркөөх килбэйэр киинигэр турар, педагогическай үлэ уонна спорт бэтэрээнэ, волейболга уонна чэпчэки атлетикаҕа өрөспүүбүлүкэ чөмпүйүөнэ, Таатта улууһун уонна Октябрьскай нэһилиэгин бочуоттаах олохтооҕо Гаврил Власов аатынан култуурунай-спортивнай комплекска, улуустааҕы Спартакиада сочуотугар киирэр улуус волейболга чөмпүйүнээтэ буолан ааста. Эр дьоҥҥо 11, кэрэ аҥаардарга 8 хамаанда түмсэннэр, иккилии бөлөххө арахсан кииристилэр. Бөлөхтөртөн иккилии кыайыылаах хамаандалар тахсаннар, бириистээх миэстэлэри былдьастылар. Кииҥҥэ олорор нэһилиэк олохтоохторо дьиэлэрин киин ититэр ситимҥэ холбононнор, иллэҥсийбиччэ икки күнү тилэри волейбол оонньуутун сытыы киирсиилэрин кэтээн көрдүлэр, бэйэлэрин ыччаттарыгар ыарыйдылар.

Балтараа күннээх кытаанах киирсиилэр кэннилэриттэн, эр дьоҥҥо Кыйы, Чөркөөх, Ытык Күөл-1, Харбалаах, кыргыттарга Кыйы, Чөркөөх, Ытык Күөл-1 Туора Күөл хамаандалара түмүк киирсиилэргэ тахсаллар. И.Федосеев аатынан оҕо спортивнай оскуолатын волейболга сиэксийэтин уолаттара (Тириэнэр И.Г.Турнин) убайдарын кытта тэҥҥэ оонньоһон, уопут ыллылар. Аны аҕыйах сылынан кинилэртэн оройуоммут чиэһин үрдүк таһымҥа көмүскүүр ыччаттар тахсыахтара диэн эрэнэ күүтэбит. Улуустааҕы олох-дьаһах коммунальнай хаһаайыстыбатын үлэһиттэриттэн турар, Ытык Күөл-2 хамаандата бөлөҕөр үһүс миэстэҕэ тахсан, кыл-мүччү финалга тахсыбата. Билигин кырыа кыһыммыт кэлэн, саамай эппиэттээх учаастактарга үлэлии сылдьар ОДьКХ уолаттара күүстээх үлэ быыһыгар бириэмэ булан дьарыктанан, күрэхтэһэ сылдьаллара атын эдэр ыччаттарга холобур эрэ буолуон сөп.

Күүстээх финальнай оонньуулар кэннилэриттэн түмүк эр дьоҥҥо да, кэрэ аҥаардарга да биир буолла. Ол курдук Ытык Күөл-1 хамаандата иккиэннэригэр бастаата. Онтон Кыйы уонна Чөркөөх хамаандалара иккиэннэригэр иккис уонна үһүс миэстэлэргэ таҕыстылар. Нэһилиэктэрин бастакы миэстэҕэ таһаардылар уонна түөстэригэр кыһыл көмүс мэтээллэри кэттилэр: Вилюяна Павлова, Анна Башарина, Надежда Попова, Лена Ючюгяева, Ульяна Павлова, Вера Кириллина, Анна Турантаева; Иван Турнин, Герасим Турнин, Николай Степанов, Денис Слепцов, Ариан Турнин, Юрий Иванов, Егор Грязнухин. Волейбол курдук маассабай, ыччат сөбүлүүр көрүҥэр Дэбдиргэ, Баайаҕа, Уус Таатта, Хара Алдан (бары П.Алексеев сопхуостар эбит) хамаандалара кыттыбатахтара хомолтолоох. Урут оройуоҥҥа миэстэлэһэр хамаандалар кэлбиттэрэ буоллар, улахан буккууру таһаараллара хаалла.

Билигин Арассыыйаҕа адаптивнай спорт күүскэ өйөнөн, сайдан эрэр. Кэлин ыытыллыбыт сурдлимпийскай уонна паралимпийскай оонньууларга Арассыыйа спортсменнара наар инники күөҥҥэ сырыттылар. Кыайыылаахтары, олимпийскай чөмпүйүөннэри кытта тэҥнээннэр, оннук сууммалаах харчынан бириэмийэлэри, сыаналаах массыыналары туттарар буоллулар. Саха сиригэр эмиэ адаптивнай спорт күүскэ сайдар. Элбэх сурдлимпийскай уонна паралимпийскай оонньуулар чөмпүйүөннэрэ уонна призердара баар буоллулар. Бу саҥа сайдан эрэр салааны Саха сиригэр биһиги биир дойдулаахпыт Анастасия Семеновна Михайлова салайар, элбэх өрүттээх үлэни ыытар.
Бу соторутааҕыта Тульскай уобаласка ыытыллыбыт олорон эрэ оонньонор волейболга Арассыыйа чөмпүйүнээтигэр Саха сирин хамаандата тириэнэр Константин Гаврильев салалтатынан ситиһиилээхтик кыттан кэллэ. Саха уолаттара элбэх күүстээх хамаандалары кэннилэригэр хаалларан, иккис төгүлүн киэҥ Арассыыйа саамай улахан түһүлгэтин боруонса мэтээлин кэттилэр. Саамай үөрүүлээҕэ хамаанда оонньооччуларыгар барыларыгар волейболга Арассыыйа спордун маастарын аатын иҥэрдилэр.

Кинилэр истэригэр талыы талба Таатта ыччата Василий Мордовской эмиэ баар. Василийы үрдүк ситиһиитинэн, волейбол курдук уустук көрүҥҥэ Тааттаттан бастакынан Арассыыйа маастара буолбутунан эҕэрдэлээн туран, кыратык билсэн ааһыаҕыҥ. Василий Тыараһа нэһилиэгэр төрөөбүтэ, биэс уолтан улаханнара. Чурапчытааҕы физкультурнай институту бүтэрбитэ. Онно хотугу многоборьенан дьарыктанан, СӨ спордун маастара буолбута, бэйэтэ кэккэ ситиһиилэрдээх. Кэнники оһолго түбэһэн баран, бэйэтин күүстээх санаатынан таптыыр, сүгүрүйэр спордун бырахпатаҕа. Олорон эрэ волейболга көһөн, күүскэ дьарыктанан Саха сирин сүүмэрдэммит хамаандатын биир бастыҥ оонньооччута буола үүннэ. Элбэхтик сбордарга, күрэхтэһиилэргэ кыттар. Билигин Кыйыга коррекционнай оскуолаҕа иитээччинэн үлэлиир.
Уопсайынан Мордовскойдар дьиэ кэргэн, бары спорт куттаах ыаллар. Василий бииргэ төрөөбүт бырааттара бары спорт араас көрүҥнэринэн үлүһүйэн дьарыктаналлар. Улахан быраата Геннадий оҕо эрдэҕиттэн аты бүөбэйдэһэн улааппыта, оскуола саҕаттан күрэхтэһиилэргэ ат сүүрдэрэ, ат баайа сылдьыбыта. Билигин СӨ ат спордун Федерациятын чилиэнэ, ат спорда сайдыытыгар үлэлэһэр. Ааспыт сайын Үөһээ Бүлүүгэ «Манчаары оонньууларын» кэмигэр ыытыллыбыт ат сүүрдүүтүн тэрийсибитэ уонна судьуйалаабыта. Иккис быраата Анатолий эмиэ убайын батыһан Чурапчытааҕы физкультурнай институту бүтэрбитэ, эмиэ убайын курдук хотугу многоборьенан дьарыктаммыта. Ол гынан баран, Арассыыйа уонна СӨ спордун маастара буолан, убайын аһары түспүтэ. Саха сиригэр хотугу многоборье сайдыытыгар күүскэ үлэлэһэр, СӨ Федерациятын Президиумун чилиэнэ, өрөспүүбүлүкэ категориялаах судьуйа. Кыра быраат Семен үлэтин быыһыгар волейболунан дьарыктанар. Манна барытыгар төрөппүттэр оруоллара улахан. Оҕолорун спортка сыһыарбыт, биир дьиэттэн икки Арассыыйа уонна СӨ спордун маастардарын иитэн таһаарбыт төрөппүттэргэ улахан эҕэрдэбитин уонна махталбытын тиэрдиэх тустаахпыт.
Кэлэр сайын Амма улууһугар ыытыллар Саха сирин норуоттарын VII Спартакиадатын программатыгар олорон эрэ волейбол эмиэ киллэриллэн турар. Онон бу саҥа киирбит көрүҥҥэ улуус хамаандата тэриллэригэр, Арассыыйа спордун маастара Василий Федосьевич Мордовской төһүү күүс, өйөбүл буолуоҕа диэн эрэнэбит.

Анатолий Мурунов.

Поделиться: