Булгуччулаах медицинскэй страховкалааһын. Ыйытыктар, хоруйдар.

266

Булгуччулаах медицинскэй страховкалааһын тиһигинэн медицинскэй көмө оҥоһулларыгар  кыһалҕалаах түгэннэр аҕыйаҕа суохтар. «Сахамедстрах» тэрилтэ ордук элбэхтик ыйытыллар боппуруостарга хоруйдуур. Санатан этэбит, киһи страховкалааһын хайысхаларынан, медицинскэй өҥө туһунан, эминэн хааччыллыынан СӨ доруобуйа харыстабылын быһа линиятыгар эрийэн сүбэлэтэр кыахтаах, нүөмэрбит: 8-800-100-14-03.

— Мин сайт нөҥүө кыайан специалистка суруйтарбатым, полиһым базаҕа баар дааннайдарга көстүбэтэ. Бэйэм манна олоробун, 5-с нүөмэрдээх поликлиникаҕа сыһыарыылахпын. Хайдах дьаһанабыный?

— Эһиги http://sakhaoms.ru/webpoisk/ диэн Саха сиригэр булгуччулаах медицинскэй страховкалааһын Территориятааҕы пуондатын сайтын аадырыһынан, полис нүөмэрин бэрэбиэркэлиэххитин сеп. Эбэтэр 8-800-100-14-03 төлөпүөн нүөмэринэн Контакт-кииҥҥэ эрийэн билсиҥ.

— Уол оҕобор ортодонт көмөтө ирдэнэр. Бэйэбит поликлиникабытыгар бырааска көрдөрүнэр талону 2018 сыл, сэтинньи ыйыгар биэрдилэр!  Уонна 80000 солк., төлөбүрдээх өҥөнү туһанарга сүбэлээтилэр. Бу түгэҥҥэ булгуччулаах медицинскэй страховкалааһын биһиэхэ босхо көмөнү мэктиэлиир дуо?

— Булгуччулаах медицинскэй страховкалааһын тосхолунан 18 саастарыгар диэри оҕолорго уһуллар/уһуллубат ортодонтическай аппарат үбүлэнэр, итиэннэ эмиэ 18 сааска диэри доруобуйаларыгар хааччахтаах тиис-сыҥаах өттүгэр төрүөҕүттэн эчэйиилээх оҕолорго «Брекет-систиэмэтэ», эбэтэр үөһээ-аллараа сыҥаах тостуутугар үлэ толору төлөнөр. Онтон тиис протеһыгар, косметологическай өҥөҕө үбүлээһин көрүллүбэт.

— Булгуччулаах медицинскэй страховкалааһын өҥөлөрө ханнык докумуоҥҥа киирэллэрий? Тииһи эмтиир клиника салалтата эппэрээссийэлиир эбэтэр эмтиир үлэтин бэйэтигэр табыгастаах гына, сороҕун БМС салаатынан – босхо, атынын төлөбүрдээх оҥорор бырааптаах дуо?

— Тииһи эмтиир салааҕа булгуччулаах медицинскэй страховканан оҥоһуллар өҥөлөр 2017 сыл Тарыып сөбүлэҥэр суруллаллар. Докумуону http://сахамедполис.рф сайт – Нормативнай докумуоннар диэн балаһатыгар 11.1 – Сыһыарыыга үөрэтиэххэ сөп. Манна тииһи эмтиир көмөҕө ханнык өҥөлөр көрүллэллэрэ толору ыйыллар.

Бэлиэтээн эттэххэ, быраас ыарыыны быһаарар (диагностикалыыр) уонна эмтиир үлэтэ киһи-киһи аайы тус-туспа, клиническэй көрдөрүүлэргэ, протоколларга олоҕурар.

— Мин Москваҕа үөрэнэбин. Онон, «Макс-М» хампаанньаҕа москватааҕы полис оҥотторбутум. Сайыҥҥы сынньалаҥҥа дойдубар кэлбиппэр, атын куорат полиһынан эмтииргэ аккаастаатылар. БМС тосхолунан хайдах эмтэниэхпин сөбүй?

— «Россия Федерациятыгар булгуччулаах медицинскэй страховкалааһын» туьунан 326-с №-дээх федеральнай сокуон 45-с ыстатыйатыгар олоҕуран БМС полиһа страховкаламмыт киһиэхэ босхо эмтэниини дойду бүтүн территориятыгар мэктиэлиир. Онон, базовай тосхолго киирбит көмө босхо оҥоһуллуохтаах, «Макс-М» полиһа Россия үрдүнэн үлэлиир.

Болҕойуҥ! Страховкаламмыт регионтан атын территорияҕа киһи базовай эрэ тосхолго киирбит көмөнү босхо туһанар. Ол эбэтэр, суһал уонна түргэн көмө ирдэнэр түгэннэригэр.

— Поликлиникабар, УЗИга талонум кэмин 14 хонуктан элбэх күн күүтэбин. Түргэнник хайдах көрдөрүнэбин?

— 2017 сылга, гражданнарга босхо медицинскэй көмөнү мэктиэлиир государственнай  программаны Правительство дьаһалынан 2016 cыл ахсынньы, 27 күнүгэр бигэргэппиттэрэ. Маныаха, 476 №-нэн инструментальнай чинчийии балыыһаларга 14 күн иһинэн ыытыллыахтаахтара ыйыллар (манна УЗИ эмиэ киирэр). Көрдөрүнүү эрдэ кыаллыбат түгэнигэр атын балыыһаҕа туһаайыы (направление) бэриллиэхтээх.

— Стационарга эмтэниигэ чинчийиилэргэ бараммыт ороскуоту төнүннэриэххэ сөп дуо?

— Гражданиҥҥа медицинскэй көмө Россия доруобуйа харыстабылыгар министиэристибэтэ бигэргэппит бэрээдэктэринэн уонна стандартарынан оҥоһуллар. Онон быраас ыарыыны быһаарар чинчийиилэри, эмтиир үлэни онно олоҕуран ыытар.

Өскөтүн медицинскэй өҥө иһин төлөбүр оҥорбут буоллаххытына, бары чектаргытын мунньан, медицинскэй тэрилтэ бэрэстэбиитэлигэр эбэтэр страховкаламмыт тэрилтэҕитигэр тахсыаххытын сөп.

— ЭКО (экстракорпоральнай үөскэтии) төлөбүрдээх дуо?

—  Саха сирин доруобуйа харыстабылын министиэристибэтин ЭКОҕа талар хамыһыйатын ааспыт буоллаххытына, бу өҥө – босхо оҥоһуллар.

— Республикаҕа ханнык медицинэ тэрилтэлэрэ чөлүгэр түһэрэр эмтэниини ыыталларый? 

— Булгуччулаах медицинскэй страховкалааһын  2017 сылга территориятааҕы программатыгар быраас туһаайыытынан чөлүгэр түһэрии эмтэниитин республика санаторийдарыгар барыахха сөп. Маннык өҥөнү оҥорор тэрилтэлэр испииһэктэрэ  http://сахамедполис.рф сайтка баар.

Киһи бэйэ баҕатынан, төлөөн туран, бу санаторийдарга сынньаммыт, эмтэммит буоллаҕына, ороскуот төннөрүллүбэт.

 

Босхо медицинскэй көмө туһунан ыйытыктарга хоруйу уонна сүбэни:

— 8-800-100-14-03 төлөпүөн нүөмэринэн Контакт – кииҥҥэ эрийэн;

— Тус  страховой итэҕэтиилээххэ тахсан;

— «Сахамедстрах» хампаанньа сүбэлиир-иһитиннэрэр киинигэр: Дьокуускай к.,  Курашов уулуссатын, 40/1 дьиэтин, 6 №дээх каб. үлэ күннэригэр  09:00 – 13:00 ч. уонна 14:00 — 17:00 ч. кэлэн; — «Сахамедстрах» smsmail@sakha.ru» электроннай почтатыгар суруйан;

— www.cахамедполис.рф сайт Ыйытык-хоруй балаһатыгар киирэн ылыахха сөп.

АО СМК «Сахамедстрах» СМХ АУо., 2016 сыл, сэтинньи 9c күнүнээҕи лицензията  ОС №2873 – 01.

Поделиться: