«Уйгу» саҥа маҕаһыына аһылынна

469

Сэргээн аах

Улууска урбаанньыттар, «Уйгу» маҕаһыын хаһаайыттара Виталий Михайлович, Ванда Владимировна Никифоровтары билбэт киһи суоҕа буолуо. Кинилэр улууска атыы-эргиэн эйгэтэ сайдарыгар улахан кылааттарын киллэрэллэр. Ону сэргэ улууска, нэһилиэктэргэ ыытыллар общественнай да, культурнай да, спортивнай уо.д.а. араас тэрээһиннэргэ спонсордаан, бириис туруоран, үгүс көмөнү оҥороллор.

Никифоровтар быйыл сайын от ыйыттан эргэ маҕаһыыннарын оннугар саҥа, икки этээстээх маҕаһыын дьиэтин тутан үлэҕэ киллэрдилэр. Бу күннэргэ улуус киинигэр саҥа маҕаһыын аһыллыытын үөрүүлээх тэрээһинэ буолан ааста. Маҕаһыын аһыллыытын улуус ытык кырдьаҕаһа, алгысчыт И.И.Унаров аал уотун уматан, арыылаах алаадьынан, саламаатынан айах тутан, сылгы маҥан сиэлинэн сыт таһааран, сирин-дойдутун уохтаах кымыһынан угуттаан, тыл бастыҥынан алҕаата. Ол кэнниттэн саҥа маҕаһыын ааныгар туора тардыллыбыт кыһыл лиэнтэни быһа кырыйар түгэн тосхойдо. Лиэнтэни быһа кырыйар чиэс улуус баһылыга М.М.Соровка, улуус депутаттарын Сэбиэтин бэрэссэдээтэлэ В.А.Охотиҥҥа, Таатта нэһилиэгин баһылыга Е.И.Павловка уонна маҕаһыын хаһаайына В.М.Никифоровка тигистэ. Дьэ, ити кэнниттэн мустубут дьон саҥа маҕаһыын иһигэр тоҕо сууллан киирэллэр. Кинилэри элэккэй атыыһыттар, маҕаһыын үлэһиттэрэ сахалыы алаадьынан, арыылаах саламаатынан, кырылыы кыынньар кымыһынан, минньигэс суогунан, уохтаах сампааныскайынан айах тутан көрүстүлэр. Атыылаһааччылар үөһээ, аллараа этээһинэн сылдьан, наадалаахтарын булан, кассаҕа үмүөрүһэллэр. Маҕаһыын хаһаайыттара бастакы атыылаһааччыларыгар сэмэй бэлэхтэри туттардылар.

Маҕаһыын аһыллыытын кэмигэр хаһаайка В.В.Никифорованы көрсөн, тутуу туһунан ыйыталаһан кэпсэтэ сырыттым:
— Маҕаһыыммытын Чурапчыттан кэлбит К.И.Лебедев генеральнай директордаах «Алаас» ХЭО тутта, истэри-тастары барытын кинилэр үчүгэй хаачыстыбалаахтык ситэрэн-хоторон оҥордулар. Атыылыыр сирин уопсай иэнэ 250 кв. м кэриҥэ. Бастакы этээскэ хаһаайыстыбаҕа аналлаах табаардар, иккискэ сад, оҕуруот үүнээйилэрэ атыыланыахтара. Маҕаһыын үлэтэ, табаардары аттаран туруорууттан саҕалаан атыы-тутуу тэрээһинигэр тиийэ аныгы ирдэбиллэргэ эппиэттиир гына тэрилиннэ. Ол эбэтэр кассаттан саҕалаан электроннай-цифровой технология олоххо киирдэ. Онон туох баар суот-учуот үлэтэ — барыта электроннай, үп-харчы киириитэ-тахсыыта тута аахсыллан иһиэҕэ. Поставщиктары кытта эмиэ электроннай сибээс олохтонно. Онон кинилэр табаары биһиги үлэхпитинэн көрө сылдьан ыытыахтара. Саҥа маҕаһыын аһыллыытыгар сүрдээх үгүс киһи сырытта, дьон үөрдэ-көттө, астынна, элбэх кырдьаҕас сылдьан, алгыс тылын тиэрдэн таҕыста. Онон үөрүүбүт улахан. Маҕаһыыммытыгар атыылаһааччыларга анаан кэмиттэн-кэмигэр араас акциялары ыытыахпыт. Сыл түмүгүнэн элбэҕи атыыласпыт атыылаһааччыларбытыгар бэлэх оҥоруохпут. Оттон бүгүҥҥү тэрээһиммит өрөспүүбүлүкэ биллэр-көстөр ырыаһыттара кыттыылаах улахан кэнсиэринэн түмүктэниэҕэ, – диэн Ванда Владимировна үөрүүтүн ыһа-тоҕо үллэстэр.

Дьэ, ити курдук улууска өссө биир баай-талым табаардаах, хаһаайыстыбаҕа наадалаах малы-салы, дьиэҕэ-уокка туттуллар араас тэрили, электротабаардары, бытовой химияны, дьиэҕэ, оҕуруокка үүннэриллэр сибэкки, үүнээйи эгэлгэтин уо.д.а. атыылыыр маҕаһыын үлэҕэ киирэн, улуус олохтоохторугар аанын тэлэччи аста.

Бэйэбит инф.

Поделиться: