Улуустааҕы комплекснай Спартакиада түмүктэннэ

277

СОРОХ НЭҺИЛИЭКТЭР ТОҔО КЫТТЫБАТ БУОЛЛУЛАР?

Сэтинньи бастакы декадатыгар Орто Амма нэһилиэгэр улуустааҕы комплекснай Спартакиада сочуотугар киирэр саахымакка хамаанданан күрэхтэһии буолан ааспыта. Нэһилиэктэр сылайдылар дуу, массыыналарыгар уматык көстүбэтэ дуу, Спартакиада бүтүүтэ саамай эппиэттээх, хамаанданан түмүк быһаарыллаары турдаҕына, хамаандалар кыттыылара мөлтөөн биэрдэ. Бу сырыыга 6 эрэ хамаанда түмсэн, санааларын түһэрбэккэ хас биирдии очукуо туһугар кытаанахтык кииристилэр.

Түмүккэ оройуоҥҥа саахымат биһигинэн биллэр, Октябрьскай нэһилиэк хамаандата 20,5 очукуону хомуйан, атыттары ырааҕынан быраҕан бастакы миэстэни ылла. Кыайыылаах хамаандаҕа оонньоотулар: маастарга кандидат Анатолий Охотин, Дмитрий Максимов, дэгиттэр спортсмен, спорт бэтэрээнэ Константин Матаннанов, Валерия Неустроева, Александра Жегусова. Иккис миэстэҕэ Амма нэһилиэгэ, үһүскэ Дьүлэй нэһилиэгэ таҕыстылар.

Дуоскаларынан бириистээх миэстэлэри ыллылар: 1 дуоска, Степан Соров (Амма), Анатолий Охотин, Семен Варламов (Дьүлэй); 2 дуоска, Дмитрий Максимов, Егор Наумов (Дьүлэй), Петр Аргунов (Игидэй); 3 дуоска, Варвара Трофимова (Орто Амма), Валерия Неустроева, Ульяна Наумова (Дьүлэй); 4 дуоска, Пантелеймон Малышев (Амма), Константин Матаннанов, Николай Мосорин (Орто Амма); 5 дуоска, Александра Жегусова, Мотрена Егорова (Игидэй), А.Р.Софронова (Амма).

Эһиил Амма улууһугар ыытыллар Саха сирин норуоттарын VII спортивнай оонньууларыгар саахымат эмиэ биир сүрүн көрүҥ быһыытынан киирэ сылдьар. Урукку Спартакиадаларга, өрөспүүбүлүкэ хамаанданан күрэхтэһиилэригэр Таатта саахыматчыттара бириистээх миэстэттэн түспэт буолаллара. Онон бу хаалбыт бириэмэҕэ өрө охсон ылыахха, хамаанданы туруорууга, бэлэмнээһиҥҥэ күүстээх үлэни ыытыахха наада.
Ааспыт нэдиэлэҕэ Ытык Күөл таас саалатыгар улуустааҕы комплекснай Спартакиада бүтэһик көрүҥэр, остуол тенниһигэр хамаанданан күрэхтэһии ыытыллан түмүктэннэ. Хамаанда састаабыгар бары көлүөнэни хабан, сэттэ оонньооччу кытынна: уол, кыыс, икки эр киһи, дьахтар, бэтэрээн эр киһи, бэтэрээн дьахтар. Барыта тоҕус хамаанда кытынна. Дьиктитэ урукку П.Алексеев сопхуос 4 отделенията: Хара Алдан, Уус Таатта, Уолба, Баайаҕа кыттыбатылар. Хайдах эрэ бойкоттаабыттар дуу, диэн санаа охсуллан ааһар. Онтон урут ыраах сытар Хара Алдан нэһилиэгэ кэлэн, улахан нэһилиэктэр хамаандаларын иннилэригэр түһэн, улууска бастыы сылдьыбыт кэмнээхтэрэ. Бу да сырыыга кыракый Даайа Амма хамаандата атыттарга таһаҕас буолла.

Сыралаах киирсиилэр кэннилэриттэн, Тааттыныскай нэһилиэк бастаан таҕыста. Хамаанда састаабыгар оонньоотулар: уолаттарга Дархан Ефремов, кыргыттарга Милена Кириллина, эр дьоҥҥо Арсен Платонов, Николай Таллаев, дьахталларга Вилюяна Павлова, бэтэрээннэргэ Николай Никифоров, Альбина Павлова. Иккис миэстэни Сеня Катакинов, Соня Антоева, Василий Сенькин, Николай Антоев, Галина Варламова, Иван Попов, Галина Попова састааптаах Уус Амма нэһилиэгин хамаандата ылла. Алеша Унаров, Йоланда Захарова, Николай Сергучев, Егор Наумов, Ульяна Васильева, Василий Аянитов, Клавдия Аянитова састааптаах Дьүлэй нэһилиэгин хамаандата, элбэх улахан нэһилиэктэри кэннилэригэр хааллартаан, үһүс миэстэ буолла. Манна мин биири бэлиэтиэхпин баҕарабын, Уус Амма уонна Дьүлэй нэһилиэктэрин баһылыктара Егор Васильев уонна Олег Осипов хамаанданы аҕалан эрэ буолбакка, тэҥҥэ сылдьыһан, дьонноругар ыалдьан, кыайыыга кынаттыыллар. Нэһилиэнньэлэрэ аҕыйах да буоллар, түмсүүлээх буоланнар, улахан нэһилиэктэри кытта тэҥҥэ анньыһаллар, сороҕор кыайаллар даҕаны. Атын нэһилиэктэр баһылыктара кинилэртэн холобур ылыахтарын баҕарабын. Салгыы күүстээх теннисчиттэрдээх Тыараһа, Орто Амма, Игидэй нэһилиэктэрэ алта бастыҥ иһигэр киирдилэр. Манан сылы быһа ыытыллыбыт комплекснай Спартакиада түмүктэннэ. Аны күүстээх очукуолары ааҕыы кэнниттэн, уопсай түмүк таһаарыллыаҕа. Кэлин ханнык нэһилиэктэр инники күөҥҥэ тахсыбыттарын, кимнээх хаалбыттарын билиһиннэриэхпит.

Анатолий Мурунов.

Поделиться: