ОДьКХ төлөбүрүгэр субсидияны хайдах туһаныахха сөбүй?

80

2018 сыл түмүгүнэн Таатта улууһугар барыта 1057 ыал олорор дьиэ-уот уонна хомунаалынай өҥө иһин төлөбүрдэригэр субсидиянан туһанна, ол эбэтэр, улууска олорор ыал уопсай ахсааныттан 20,9 % бу государственнай өҥөнөн хабылынна. Төлөнүллүбүт субсидия уопсай сууммата 35307,55 тыһ. солк. тэҥнэстэ.

Арассыыйа сокуонунан дойду олохтоохторо биир ыйга ОДьХХ өҥөтүн туһаныы иһин төлөбүрдэрин кээмэйэ ыал биир ыйга аахсар уопсай дохуотун 15%-н үрдүк буоллаҕына дьиэ-уот уонна хомунаалынай өҥө иһин төлөбүрдэригэр субсидия көрүллүөн сөп.
Олорор дьиэ-уот уонна хомунаалынай өҥө иһин төлөбүрдэргэ субсидия биир тэҥ-халбаҥнаабат суумма буолбат уонна дьиэ иэниттэн, хас киһи пропискаламмытыттан, пропискалаах дьон дохуотуттан, хас уонна ханнык коммунальнай өҥө оҥоһулларыттан, тарыыптартан тутулуктаах.
Кимнээх туһанар бырааптаахтарый?
— Бэйэ бас билиитигэр баар дьиэлээхтэр, кыбартыыралаахтар, хостоохтор;
— Судаарыстыбаннай, муниципальнай эбэтэр кэтэх дьиэҕэ наймылаһыы дуогабарын түһэрсэн олорооччулар.
2013 сыл ахсынньы 25 күнүгэр Саха сирин бырабыыталыстыбата бигэргэппит 473№-дээх уурааҕар олоҕуран, субсидияны биэрии саҥа бэрээдэгэ олоххо киирдэ. Бу хааччылëыыта суох дьиэҕэ олорор дьон, ол эбэтэр маһынан оттуллар дьиэлээхтэр урукку өттүгэр олорор дьиэлэригэр государственнàй регистрация сибидиэтэлистибэтэ булгуччу ирдэнэр буоллаҕына, билиҥҥи кэмҥэ тустаах докумуоннары сэргэ олохтоох дьаһалтаттан ыспыраапка эбэтэр дьиэ тугунан сылыталлара ыйыллыбыт техническэй пааспарын туттардахтарына субсидиянан туһанар кыахтаналлар. Киинтэн эбэтэр уотунан сылытыылаах, уунан кииннээн хааччыйыыга холбонуулаах дьиэлэргэ ити докумуон уруккутун курдук ирдэнэр.
Ханнык докумуонннар ирдэнэллэрий?
Бүддьүөттэн бэриллэр буолан, субсидияны анааһын туһунан ирдэбиллээх, бэрээдэктээх, туһунан ирдэнэр докумуоннардаах. Субсидияҕа хапсаргытын саарбахтыыр түгэҥҥитигэр биһиги сулууспабыт нүөмэригэр 42-731 эрийэн суоттатан көрүөххүтүн сөп, эбэтэр интернеттээх буоллаххытына http://subsidii-jku.ru/ киирэн «Калькулятор» көмөтүнэн субсидияҕа хапсар-хапсыбат эбиккитин барыллаан, суоттаан көрүөххүтүн сөп.
«Хапсар кыахтааххыт» диэтэхтэринэ докумуоннаргытын хомуйан саҕалыыгыт. Маннык докумуоннары копиялаан туттараргыт ирдэнэр:
— паспорт, субсидия ылыахтаах дьиэҕитигэр булгуччу пропискалаах буолуохтааххыт;
— дьиэни, баанньыгы (баар буоллаҕына) бас билэр докумуон, дьиэ сибидиэтэлистибэтэ;
— дьиэ кэргэн састаабын туһунан ыспыраапка;
— кэргэннии буолуу туһунан туоһу сурук;
— биэнсийэлээх, бэтэрээн, инбэлиит дастабырыанньата;
— дьиэ кэргэн бары чилиэнин дохуотун туоһулуур ыспыраапкалар (2 НДФЛ, устудьуон стипендиятын ыспыраапката, биэнсийэ, босуобуйа);
— ИП-лэр (налоговай декларациялара, дохуот уонна ороскуот кинигэтэ);
— уот, уу өҥөтүн төлөөбүккүт туһунан квитанция;
— харчы түһүөхтээх счеккут нүөмэрэ уонна да атын докумуоннар.
Ыал аайы туттарыллыахтаах докумуон араастаһыан сөп. Биир докумуон итэҕэһиттэн эрэйдэммэт туһугар болҕомтолоох буолуҥ. Докумуон туттараргытыгар куоппуйаны кытта дьиҥнээх докумуоннаргытын барытын (оригиналларын) илдьэ барыҥ. Нотариальнай бигэргэтиитэ суох куоппуйаны хайаан да оригиналы кытта тэҥнээн эрэ баран ылыллар.
Өскөтүн бэйэҕит олорор нэһилиэккититтэн кыайан киирбэт түгэҥҥитигэр нэһилиэккит олохтоох дьаһалтатын испэсэлииһигэр докумуоннаргытын биэрэн ыытыаххытын сөп, онно куоппуйаларгытыгар испэсэлииһинэн бэчээт туруоттарыаххытын наада. Бары дьаһалталарга сайабылыанньа, ханнык докумуоннар ирдэнэллэрэ бааллар. Пенсия, босуобуйа ылыыга дьон күнүн-дьылын бараабатын диэн, ити тэрилтэлэри кытта бииргэ үлэлэһии электроннай тиһигэ баар. Онуоха эһиги «согласие на обработку персональных данных» суруйан, илии баттаан биһиэхэ биэрдэххитинэ, эһиги оннугутугар биһиги ирдиир буолабыт. Ити себулэьии куоппуйалара олохтоох дьаһалталарга эмиэ бааллар.

Е.ПОСТНИКОВ, аадырыстаммыт
субсидияларга сулууспа Таатта улууһунааҕы
салаатын салайааччыта.

 

Поделиться: