Дьокууускай туонатыгар-Таатта күннэрэ

291

Бу күннэргэ өрөспүүбүлүкэбит тэбэр сүрэҕэр Дьокуускай куоракка үтүө үгэскэ кубулуйбут Таатта күннэрэ ыытыллар. Быйыл бу тэрээһин улуу биир дойдулаахпыт П.А.Ойуунускай төрөөбүтэ 125 сылыгар «Мин туйгум норуотум — Айар күүс кыһата» диэн ааттанан үгүс тэрээһиннэр ыытыллаллара
былааннанар.
Улууспут күннэрэ кулун тутар 25 күнүттэн «Былатыан ыччаттарын айар түһүлгэлэрэ» улуус студеннарын уонна ыччаттарын кытта доҕордоһуу
көрсүһүүтүттэн саҕаланна. Киэһэтин биир дойдулаахпыт Уус Амма нэһилиэгин олохтооҕо, элбэх оҕолоох дьиэ кэргэн аҕа баһылыга И.И.Тистяхов II Москва куоракка эмтэнэ барарыгар аналлаах аһымал кэнсиэр буолла.
Аһымал акцияҕа биир дойдулаахтарбыт Дария Лаврова, Виталий Очиров, Александра Старостина, Ильдар, Кеша Васильев, Роман Дедюкин, «Арчы» бөлөх, «Табыс» студеннар түмсүүлэрэ уо.д.а. кыттыыны ыллылар. Улууспу-
туттан анаан-минээн Ф.С.Аргунов аатынан оҕо музыкальнай оскуолатыттан «Кылыыҥкай» оҕо үҥкүү образцовай ансаамбыла, баянист Сергей Винокуров, Уус Амма ыччаттара кытыннылар. Кэнсиэр Уус Амма нэһилиэгин ытык
мааны олохтооҕо, РФ үөрэхтээһинин үтүөлээх үлэһитэ М.П.Прокопьева алгыһынан саҕаланна. Улууспут аҕа баһылыга М.М.Соров бар дьонугар анаан ыҥырыы оҥордо. Ол курдук, биир киһи, биир ыал кыһалҕата диэн туора турбакка биир санаанан салайтаран, «Айыы киһитэ аһыныгас, күн
киһитэ көмүскэс» дииллэринии бары туох кыалларынан түмсүүлээхтик көмөлөһөн, Иван Иванович ыарахан ыарыыны утары охсуһарыгар көмө булуоҕуҥ диэн ыҥырда.
Улууспут күннэрин дьыалабыай көрсүһүүлэриттэн биирдэстэригэр Таатта улууһун баһылыга М.М.Соров салайааччылаах улуус салалтата, нэһилиэк баһылыктара Дьокуускай куорат мээрин А.С.Николаевтыын
уонна тутаах үлэһиттэрин кытта бииргэ үлэлээһиҥҥэ кэпсэтии ыыттылар. Биир бэлиэ тэрээһининэн П.А.Ойуунускай суруйан хаалларбыт «Сүүс сыллаах улуу былаан» кэнниттэн XXI-с үйэҕэ көрүүлэр тустарынан «Төгүрүк остуол», эдэр суруйааччылар мунньахтарын кыттыылаахтарын кытта Былатыан Ойуунускай пааматынньыгар тыыннаах сибэкки дьөрбөтүн уурдулар. Маны тэҥэ улууспут тыа хаһаайыстыбатын, «Сделано в Таатте» атыы-эргиэн быыстапкалара киэҥ сэҥээриини ыллылар.
Таатта күннэрин түмүктээн Д.К. Сивцев-Суорун Омоллоон аатынан Государственнай опера уонна балет театра «Мин туйгун норуотум, айар күүс кыһата» улууспут уус уран самодеятельноһын улахан кэнсиэринэн, биир сомоҕо буолар оһуордаах оһуохайынан түмүктэниэҕэ.
С.ХАЛГАЕВА.

Поделиться: