Сэттэ мэтээл эбэтэр хамаанданан бэһис миэстэ

252

Мас тардыһыытыгар СӨ чөмпүйүнээтэ түмүктэннэ
Быйыл улууска мас тардыһыытыгар улахан уларыйыылар тахсаннар, саҥа сүүрээн, саҥа хамсааһын таҕыста. Тохсунньуга улуустааҕы Федерация саҥа салайааччытынан, улуус баһылыгын солбуйааччы Ариан Потапов, толоро-
оччу дириэктэринэн, өрөспүүбүлүкэ таһымнаах судьуйа Петр Ермолаев (Дэбдиргэ), улахан дьоҥҥо баһылык тириэнэринэн, спорт маастара Вячеслав Аввакумов (Чөркөөх), оҕолорго баһылык тириэнэринэн, спорт маастара Петр Стрекаловскай анананнар, үлэлэрин былааннааннар, тэтимнээхтик
саҕалаатылар. Онон саҥа тэриллибит Федерация, улуустааҕы спорткомитет тэрээһиннэринэн, саҥа баһылык тириэнэр Вячеслав Аввакумов салалтатынан,
СӨ быйылгы чөмпүйүнээтигэр Тааттаттан 29 мадьыны кыттыыны ылла.
Саха өрөспүүбүлүкэтин мас тардыһыыга чөмпүйүнээтэ кулун тутар 16-17 күннэригэр Дьокуускай куорат «Модун» спортивнай комплексыгар буолан ааста. Күрэхтэһии «три в одном» диэбит курдук, эр дьоҥҥо, дьахталларга, бэтэрээннэргэ диэн тус-туһунан араарыллан, биир чөмпүйүнээт быһыытынан ыытылынна. Саха сирин бары муннугуттан 28 хамаандаҕа 410
масчыт түмсэн, барыта 22 ыйааһыҥҥа бириистээх миэстэлэри былдьастылар. Буоларын курдук Дьокуускай куорат, Уус Алдан, Чурапчы, Амма, Мэҥэ Хаҥалас, Таатта олус күүстээх хамаандалары аҕалбыттар уонна сүрүннээн
кинилэр икки ардыларыгар кытаанах киирсиилэр буоллулар.
Аллараа ыйааһыннарга хас чөмпүйүнээт аайы саҥаттан саҥа ааттар тахсаллара, үгэскэ кубулуйда. Бу да сырыыга 60 кг ыйааһыҥҥа Арассыыйа, СӨ чөмпүйүөнэ, СӨ спордун маастара Дмитрий Саввин, эдэр уолга Айсен Мигалкиҥҥа хотторон, бириистээх миэстэҕэ да киирбэтэ. Ол оннугар
биһиги уолаттарбыт, спорт маастара Модест Баишев уонна ааспыт сайын Үөһээ Бүлүүгэ ыытыллыбыт «Манчаары оонньуулара» ХХ Спартакиада уолаттарга бу ыйааһыҥҥа кыайыылааҕа, билигин ХИФУ I курсун устудьуона
Василий Андросов сүрдээҕин эриһэн киирсэннэр, иккиэн боруонса мэтээли кэттилэр. 75 кг ыйааһыҥҥа Аан дойду чөмпүйүөнэ, спорт маастара Айаал Карбаканов бириистээх миэстэҕэ чуут хапсыбакка, бэһис миэстэ буолла. Бу-
хатыырдар көрүҥнээх, бөҕө-таҕа уолаттар мустубут 125 кг ыйааһыннарыгар, маастарга кандидат Владимир Михайлов табыллан киирсэн, түөһүгэр боруонса мэтээли кэттэ. Биир дойдулаахпыт, Аан дойду үрүҥ көмүс призера, билигин Дьокуускай чиэһин көмүскээбит Виктор Докалов 105 кг
кыттан эмиэ боруонса мэтээлинэн бэлиэтэннэ.
Мас тардыһыытыгар Саха сирин дьахталларыттан биир саамай үрдүк ситиһиилээхтэрэ, Аан дойду чөмпүйүөнэ, Арассыыйа, Саха сирин хас да төгүллээх кыайыылааҕа, СӨ спордун маастара Туйаара Орлова бу күрэхтэһиигэ төрөөбүт улууһун аатыттан кыттан, спорду сэргээччилэри, биир дойдулаахтарын үөртэ. Туйаара бу да сырыыга, үчүгэй туругар сылдьарын көрдөрөн, 85 кг ыйааһыҥҥа кыахтаахтык бастаата. Уопсайынан кыргыттар бэйэлэрин кыахтарынан үчүгэйдик кытыннылар. Эмиэ бу ыйааһыҥҥа Надежда Никулина уонна 75 кг Галина Варламова үһүс миэстэ буоллулар.
Бэтэрээннэр күрэхтэһиилэригэр, 85 кг ыйааһыҥҥа эдэр бэтэрээн, спорт маастарыгар кандидат Василий Варламов саҥа кыттаат да, үһүс миэстэҕэ тахсыыта, үчүгэй көрдөрүү буолар. Кэлин үчүгэйдик дьарыктаннаҕына, дьарыга ситтэҕинэ-хоттоҕуна Василийга ыйааһыныгар бастыҥ буоларга бары
кыахтар бааллар. 85 кг үөһээ Сахаадаспорт маастара Дмитрий Попов үһүс миэстэ иһин киирсэн баран хоттордо. 75 кг спорт маастара Вячеслав Аввакумов бэйэтин кыаҕынан киирсэн, наадалаах очукуолары аҕалла.
Хамаанданан уопсай түмүккэ 99 очукуолаах Уус Алдан хамаандата үһүс сылын субуруччу бастаата. 148 очукуолаах Дьокуускай куорат, 173 очукуолаах Мэҥэ Хаҥалас хамаандалара иккис үһүс миэстэлэргэ таҕыстылар. Таатта хамаандата, Аммалар кэннилэриттэн бэһис миэстэни ылла. Ыалларбыт Чу-
рапчылар алтыс миэстэ буоллулар. Хамаанда бэһис миэстэҕэ тахсарыгар, үөһээ ахтыллыбыт мадьынылары таһынан, эр дьоҥҥо Айаал Максимов, Николай Матаннанов, Семен Степанов, дьахталларга Мария Афанасьева, Евдокия Накатова кытаанах киирсиилэргэ, элбэх көлөһүннэрин тоҕон,
сочуот биэрэр наадалаах очукуолары аҕалбыттарын бэлиэтиибит.
Чөмпүйүнээт иннинэ СӨ мас тардыһыыга Федерациятын отчуоттуур-быыбардыыр мунньаҕа буолла. Федерация салайааччыта, «СӨ ОДьКХ» ГУТ гендириэктэрэ Александр Ноговицын ыыппыт үлэтин отчуоттаата. Отчуоту дьүүллэһии кэнниттэн, Федерация саҥа састааба талылынна. Саҥа салай-
ааччынан, «Сахаада-спорт» ассоциация «Сыл бастыҥ Федерацията» аатын ылбыт, Уус Алдан улууһун баһылыгын солбуйааччы Геннадий Васильев, солбуйааччыларынан Петр Каратаев, Алексей Скобелев, Олег Марков, Иннокентий Григорьев, толорооччу дириэктэринэн Петр Колодезников
талылыннылар. Быйылгы сыл саамай улахан түһүлгэтинэн, сэтинньигэ Дьокуускай куоракка ыытыллыахтаах Аан дойду уочараттаах чөмпүйүнээтэ буолуоҕа. СӨ быйылгы чөмпүйүнээтин кыайыылаахтара, Аан дойду түһүлгэтин
таһынан, Баку куоракка буолар Европа, Нальчикка тэриллэр Арассыыйа чөмпүйүнээттэригэр кыттар быраабы ылыахтара. Чөмпүйүнээт биир устуоруйаҕа киирэр түгэнинэн, саҥа олохтоммут мас тардыһыыга РФ спордун маастара ааты, үрдүк көрдөрүүлээх 14 мадьыныга туттарыылара буолла.
Бэртээхэй түгэн буолла да, биһиги улуустан биир да спортсмен хапсыбатаҕа хомолтолоох. Аны Тааттаттан ким бастакы Арассыыйа маастара буолан, түөһүгэр маастар бэлиэтин кэтэрин кэтэһэбит.
Анатолий Мурунов.

Поделиться: