Киэҥ далааһыннаахтык ыытылынна

260

Дьокуускайга – Таатта күннэрэ
Дьокуускай куоракка саха сэбиэскэй литературатын төрүттээбит суруйааччы, Саха судаарыстыбаннаһын тэрийсибит, XX үйэ саҥатыгар олох-дьаһах чыҥха уларыйыытын оҥорсубут уһулуччулаах политическэй диэйэтэл, лингвист-учуонай, наука салайааччыта П.А.Слепцов-
Ойуунускай төрөөбүтэ 125 сылыгар аналлаах Таатта улууһун күннэрэ ыытылынна.
Кулун тутар 26 күнүгэр Суорун Омоллоон аатынан Судаарыстыбаннай Опера уонна балет тыйаатырыгар Былатыан Ойуунускай төрөөбүтэ 125 сылыгар аналлаах «Мин туйгун норуотум — айар күүс кыһата» дьоро киэһэ буолла. Тэрээһин бастакы чааһыгар Былатыан Ойуунускай аатынан Тааттатааҕы народнай театр артыыстара Д.К.Сивцев-Суорун Омоллоон «Лоокуут уонна Ньургуһун» либреттотынан музыкальнай драма көрдөрдүлэр.
Таатта улууһун баһылыга Михаил Соров биир дойдулаахтарын, ыалдьыттары истиҥник эҕэрдэлээтэ. Улууска ыытыллар үлэ-хамнас, үбүлүөйдээх тэрээһин туһунан сырдатта. «Улуу убайбыт Былатыан Ойуунускай төрөөбүтэ 125 сылыгар анаан СӨ Ил Дархана Егор Борисов Бырабыыталыстыба Бэрэссэдээтэлэ Евгений Чекин салайааччылаах анал хамыыһыйа тэрийбитэ. Бу хамыыһыйа улууспутугар тахсан иккитэ мунньахтаата. Туһааннаах докумуоҥҥа илии баттаата, ол чэрчитинэн улуус салалтата үлэни ыытан саҕалаабыта», — диэн
иһитиннэрдэ.
Улуус баһылыга төрөөбүт төрүт түөлбэлэригэр күүс-көмө, сүбэ- ама буолар биир дойдулаахтарыгар махтанна. Норуот билиниитинэн «Гордость Якутии» күрэххэ «Култуура диэйэтэлэ» номинацияны ылбыт, үгүс ыччаты кэрэҕэ уһуйбут «Доҕордоһуу» үҥкүү ансаамбылын төрүттээбит ытык-мааны Августина Федоровна Клакиноваҕа махтал бэлиэтин сибэкки дьөрбөтүн бэлэхтээтилэр. Михаил Соров Таатта улууһун Бочуоттаах олохтооҕо ааты Өрөспүүбүлүкэтээҕи №2-дээх балыыһа травматологияҕа салаатын сэбиэдиссэйигэр Степан Тордуиҥҥа, «Таатта улууһугар үөрэхтээһин сайдыытыгар
кылаатын иһин» анал бэлиэни Саха Өрөспүүбүлүкэтин наукаҕа уонна үөрэхтээһиҥҥэ миниистирин солбуйааччытыгар Андрей Поповка туттарда. СӨ Ил Түмэнин Бэрэссэдээтэлэ Александр Жирков ытык дьонноох Таатта улууһун дьонун-сэргэтин дьоро киэһэнэн өрөспүүбүлүкэ парламенын уонна тус бэйэтин аатыттан истиҥник эҕэрдэлээтэ. Саха норуота былыр-былыргыттан тимир ууһун быһыытынан биллэрин, бэйэтин күннээҕи олоҕор туттар малын-салын мындырдык
оҥостон олорбутун, ол оҥоһуктар күн бүгүн музейдарга ууруллан сыталларын аҕынна. Биир кэмҥэ Е.Ярославскай аатынан кыраайы үөрэтэр музей бу оҥоһуктары түмэ сатаабытын, ол эрээри улуустар бэйэлэрин сүрүн экспонаттарын биэриэхтэрин баҕарбаттарын, харахтарын харатын курдук харыстыылларын эттэ. Спикер салгыы Баайаҕаҕа Борис Неустроев-Мандар Уус уонна Николай Егоров Баайаҕыын сүбэлэһэн, үөрэппит уустарын тылларыгар киллэрэннэр, сорудах биэрэннэр, ол дьон сорук
оҥостоннор, Саха сирин музейдарын кэрийэ сылдьан тимиринэн оҥоһуллубут сэби-сэбиргэли хайдах баарынан ойуутугар-дьарҕаатыгар, тимиригэр, маһыгар, ону ааһан ыйааһыныгар, тимирин састаабыгар тиийэ үтүгүннэрэн оҥорбуттарын, саха уустара ааспыт үйэлэргэ хаалларбыт маллара диэн, норуокка көрдөрөөрү үлэлии сылдьалларын, аҕыйах хонуктааҕыта Дьокуускайга быыстапка туруорбуттарын кэпсээбитин мустубут дьон сэргээтэ.
«Тааттаттан төрүттээх уус дьон баҕа өттүлэринэн уопсайа дьоһуннаах, улахан 91 оҥоһугу оҥорбуттар. Урукку өттүгэр биһиэхэ итинник көстүү суоҕа. Кинилэр Баайаҕаҕа урукку оскуолаларын сөргөхсүтэн, саха уустарын бастыҥ оҥоһуктарын музейа оҥорор ыра санаалаахтар. Бу үлэлэри онно туруорар былааннаахтар. Ол ыра санаалара туоларыгар, олоххо киирэригэр баҕарабын», — диэн түмүктээтэ. Александр Жирков ытык-мааны Таатта дьонугар үөрэххэ, үлэҕэ ситиһиини баҕаран туран, өрөспүүбүлүкэ социальнай — экономическэй сайдыытыгар кылаатын иһин СӨ Ил Түмэнин Бочуотунай Грамотатын Николай Егоров-Баайаҕыыҥҥа, СӨ үөрэҕириитин салаатыгар өр сыллаах үлэтин иһин Ил Түмэн Бэрэссэдээтэлин Махтал суругун Екатерина Чехордунаҕа уонна СӨ култууратыгар кылаатын иһин Ил Түмэн Бэрэссэдээтэлин Махтал суругун Станислав Луковцевка туттартаата. СӨ Бырабыыталыстыбатын Бэрэссэдээтэлин солбуйааччы Алексей Дьячковскай биир дойдулаахтарын Таатта улууһун күннэринэн эҕэрдэлээтэ уонна СӨ Ил Дарханын аатыттан эҕэрдэ суругу улуус баһылыгар Михаил Соровка туттарда. «Улуу убайбыт Былатыан Ойуунускай олоҕун, үлэтин Саха сирин кэскилин туһугар анаабыта. Кини судаарыстыбаннаһы олохтоспута, бүтүн киһи аймах олоҕун анаарар улуу айымньылары хаалларбыта, өрөспүүбүлүкэҕэ тыл науката сайдарын түстээбитэ. Тааттаттан силистээх-мутуктаах дьон улуу убайбытынан киэн туттабыт», — диэн эттэ.
Салгыы улуус уус-уран самодеятельноһын кыттыылаахтарын кэнсиэрэ дохсун ытыс тыаһынан доҕуһуолланна. Алаас ахтылҕаннаах ырыата-тойуга, үҥкүүтэ-битиитэ, үс саха үөрүүтэ-көтүүтэ, түөрт саха кэтит кэскилэ олохтонно.
Ил Түмэн пресс-сулууспата.

Поделиться: