Баайаҕа «Сулустаах эстафетаны» көрсөр

62

Комсомол 100 сыллаах үбүлүөйэ
Аалай уоттаах сулуһум
Айар, тутар суолдьутум,
Эн комсомол,
Эн комсомол,
Эн комсомол – мин дьолум.

Биһиги көлүөнэ 60-70 сылларга комсомолга киирбит, кини «ыстаал кэккэтигэр үүммүт», комсомольскай билиэттээх «олох, үлэ күргүөмүгэр» кыттыспыт, «аан дойду ыччатын сүрэҕиниин» бииргэ буолбут кэмнэрбит олус да күндүлэр, ахтылҕаннаахтар.
Саха Комсомола тэриллибитэ 100 сылыгар улууска ыытыллар«Сулустаах эстафета» алтынньы 18 күнүгэр Баайаҕаҕа кэлэр үтүө сураҕын истэн, эдэр сааспыт күөгэйэр кэмнэрин, түөлбэбит хоһуун, үлэһит ыччаттарын санаан ааһаҕын. Холкуос, сопхуос ыанньык пиэрмэлэригэр, техниканы муоһалыыр гарааска, отчут ходуһаларыгар, булт соноругар барытыгар ыччаттар, комсомолецтар төһүү күүһү ылаллара, производство бары салааларыгар үрдүк көрдөрүүнү ситиһэллэрэ. Субан сүөһүнү көрөр кыргыттар Максимова Татьяна Захаровна, Чахова Мария Гаврильевна Саха АССР Верховнай Сэбиэтин, ыанньыксыт Андросова Маргарита Романовна, биригэдьиир Накатова Анна Саввична оройуон Сэбиэтин дьокутааттарынан быыбарданан, оройуон, республика салалтатыгар кыттыспыттара. Андросов Гаврил Васильевич, Потапов Семен Иосифович, Саввин Николай Николаевич чемпион тыраахтарыыстар, Готовцев Василий Васильевич, Дедюкин Петр Егорович чемпион суоппардар үрдүк кирбиилэрин ылбыттара. Луковцева Агафья Арсентьевна Саха АССР тыатын хаһаайыстыбатын үс миниистириттэн Бочуотунай Грамотаны туппут чулуу комсомолка-ыанньыксыт. Итинник оччотоҕу комсомолецтары, ыччаттары комсомол бэйэтин тула түмэрэ, үрдүк ситиһиилэргэ көҕүлүүрэ, биир санааҕа сомоҕолуура, кэлэктиип тыыныгар иитэрэ.
«Сулустаах эстафетаҕа» улуус кииниттэн биир дойдулаахтарбыт СР култууратын үтүөлээх үлэһитэ Карл Иванович Христофоров, СР култууратын туйгуна Светлана Семеновна Игнатьева, 18 сааһыгар Уолбаҕа детсаады аспыт Мария Дмитриевна Матаннанова кэлэн, ыччат дьоҥҥо, үөлээннээхтэригэр «эдэр саас хатыламмат ол түгэннэрин» ахтан, санааларын, алгыстарын тиэртилэр. Улуус эдэр салайааччылара Иван Иванов, Миронов бэтэрээннэри кытта тэҥҥэ сылдьалларыттан, «саас-үйэ тухары кэхтибэт саҥаны, кэрэни айарга» буһуу-хатыы оскуолатын баралларыттан үөрдүбүт.
Бу истиҥ көрсүһүүгэ сопхуос, отделение комсомольскай тэрилтэлэригэр сэкирэтээрдэринэн үлэлээбит Валентина Михайловна Слепцова, Июлия Николаевна Скрябина, Розалина Ивановна Потапова, Раиса Николаевна Андросова уо.д.а. күндү ыалдьыттарынан буоллулар. Ленинскэй Комсомол төрүттэммитэ 100 сылыгар тахсыбыт үбүлүөйүнэй мэтээли комсомол бэтэрээннэрэ туттулар. Комсомол туһунан хоһооннор, ырыалар ол кэми санаттылар.
Көрсүһүү «Эн комсомол – мин дьолум» ырыаны «Аламай» вокальнай ансаамбыллыын тэҥҥэ ыллаһан, «Билигин комсомол диэн тылга мин дьолум, мин үөрүүм төлөнө!» баарын дууһабытынан, сүрэхпитинэн өссө төгүл өйдөөн тарҕастыбыт.
Маргарита ЕГОРОВА, 1970-1971 сс. ЦКО сэкирэтээрэ.

 

Поделиться: