Бырайыактары нэһилиэнньэ олоххо киллэрсиэҕэ

66

«Таатта нэһилиэгэ» муниципальнай тэриллии салалтатын тэрийиитинэн Ытык Күөл сэлиэнньэтин культурнайспортивнай комплексыгар алтынньы 19 күнүгэр 839 киһи, ол иһигэр Ытык Күөл түөрт оскуолаларыттан 9-10-11 кылаастар үөрэнээччилэрэ кыттыылаах СӨ гражданскай инициативалары өйүүр үп министиэристибэтин граннарыгар нэһилиэк олохтоохторо кыттыыларыгар, санааларын этэллэригэр, бырайыактары оҥорууга үлэлэһэллэригэр анаммыт нэһилиэнньэ киэҥ ыҥырыылаах мунньаҕа ыытылынна.
Бу мунньах туһунан «Таатта нэһилиэгэ» МТ баһылыга Егор Иннокентьевич Павловы кытта көрсөн кэпсэттим.
— Егор Иннокентьевич, СӨ үпкэ министиэристибэтэ кэлиҥҥи сылларга хас биирдии нэһилиэк олохтоохторо бэйэлэриттэн этиллибит, тус баҕаларынан оҥоһуллубут бырайыактар олоххо киириилэрэ практикаланар буолла. Бу мунньахха дьон бөһүөлэги тупсарыыга ханнык хайысхаларга этиилэри киллэрдилэр?
— Бу мунньахха киин бөһүөлэк уулуссаларын сырдатыыны күүһүрдүүгэ, элбэтиигэ, киин уулуссаларга тротуардары маһынан эрэ буолбакка, аныгылыы плиткаларынан, кэрэ көстүүлээх гына тупсаран оҥорууга, биирдиилээн ыаллар дьиэлэрин кииннэммит ититиигэ холбооһуҥҥа, культура уонна сынньалаҥ пааркатын аныгылыы күрүөлээһиҥҥэ, трибуналары саҥардыыга этиилэр киирдилэр. Түөлбэлэртэн кэккэ этиилэри бу иннинэ да киллэрэн тураллар. Манна санааларын эппит, этиилэри киллэрбит аҕам саастаах, эдэр да дьоҥҥо махтанабыт.
— Бырайыактар хайдах үбүлэнэн олоххо киириэхтэрэй?
— Ылыныллыбыт бырайыактары олоххо киллэриигэ балаһыанньа быһыытынан нэһилиэнньэттэн кыттыгас үбүлээһин оҥоһуллуохтаах. Үс сүрүн бырайыактар холбоон 4,5 мөл. солк. сыаналаах буолаллар. Бу суумма улуус, Таатта нэһилиэгин,
нэһилиэнньэ икки ардыларыгар үллэһиллэн, аттарыллан үбүлээһин тэриллиэҕэ. Нэһилиэк олохтоохторо талбыт, өйүүр бырайыактарын уопсай көрүллэр субсидия үбүттэн 10-15%, ол эбэтэр, уопсайа биир бырайыакка 150 тыһ.солк үбүлээһин харчытын олохтоохтор хомуйуохтаахтар. Олохтоох бүддьүөттэн уонна спонсордартан 200 тыһ.солк үп киириэхтээх.
Салгыы муниципальнай тэриллии СӨ үпкэ министиэрстибэтигэр олохтоох дьаһалта сайаапка түһэрэн, бу куонкуруска биир бырайыак сөбүлэҥи аастаҕына СӨ үпкэ министиэристибэтэ утары эбии 1 мөл 500 тыһ.солк көрүөхтээх. Улуус дьаһалтата Ытык Күөлгэ культура уонна сынньалаҥ пааркатын аныгылыы күрүөлээһиҥҥэ, трибуналары саҥардыыга икки бырайыагы 6 мөл.солк үбүлүүр.
— Ылыныллыбыт, үбүлэнэр бырайыактар хаһан үлэҕэ киириэхтэрэй?
— Бу бырайыактар 2019 сыл сайыныгар толоруллан, объектар бары ситэриллэн олоххо киириэхтэрэ. Манна даҕатан эттэххэ, быйыл сайын бөһүөлэк киинигэр элбэх квартиралаах дьиэлэр олбуордарыгар кэрэ көстүүлээх, оҕо аймах сөбүлээн мустар оҕо оонньуур балаһааккалара, ону сэргэ дьиэлэр иннилэригэр тупсаҕай, үйэлээх, тутуу плиткаларынан тэлгэтиллибит тротуардар баар буолбуттарын олохтоохтор бэркэ сэргээтилэр, астына, үөрэ-көтө хаамар буоллулар. Чалбах, бадараан суох буолбутуттан
дьон чахчы үөрдүлэр, подъезтар лаппа ырааһырдылар.
— Мунньахха улаатан эрэр оҕолордуун, кырдьаҕастардыын уопсайа төһө киһи кытынна? Ордук кимнээх кытыннылар?
— Уопсайа 839 киһи, ол иһигэр 100-н тахса оҕо спортсааланы толору олорон иһиттилэр, кэпсэтиилэргэ кыттыыны ыллылар. Үөрэх эйгэтин үлэһиттэрэ нэһилиэк олохтоохторун, үүнэр көлүөнэни иитэр-үөрэтэр дьон, нэһилиэнньэҕэ инники күөҥҥэ сылдьар гражданнар быһыытынан ордук хото сырыттылар. Онон, үөрэх эйгэтин үлэһиттэригэр улахан махталбын биллэрэбин.
— Мунньахха өссө кимнээх кыттыыны ыллылар?
— СӨ үп министиэристибэтин олохтоох бэйэни салайыныыны өйүүр бырагырааммаларга бэрэстэбиитэлэ Андрей Николаевич Самсонов, улуус баһылыгын социальнай боппуруостарга солбуйааччы Изабелла Александровна Сивцева, улуус дьаһалтатын экономикаҕа салаатын начальнига Артем Александрович Боппосов кыттыыны ыллылар, үгүс ыйытыыларга хардардылар, быһаарыылары биэртэлээтилэр.
— Егор Иннокентьевич, быыс булан мунньах ис хоһоонун чопчулаан, ситэрэн, быһааран биэрбиккэр улахан махтал. Дьонуҥ-сэргэҥ туһугар ыытар үлэҕèтигэр өссө үрдүк ситиһиилээх, махталлаах, бар дьонуҥ алгыһынан ситэри күүстээх буоллун.
Улуус киин бөһүөлэгэ Ытык Күөлбүт инникитин өссө тупсарыгар, кэрэ-бэлиэ миэстэлэрэ элбииллэригэр, үүнэр көлүөнэ ыччаттарбыт төрөөбүт бөһүөлэктэрэ ыраас, тупсаҕай, кэрэ буоларыгар куруутун кыһаллыахтара диэн эрэлбит улахан.
Кэпсэттэ Виктор ВИНОКУРОВ.

Поделиться: