Кыстыгы көрсө үлэ тэтимнээхтик ыытыллар

6

Сахабыт сирин самаан сайына бүтэн эрэр. Халлаан туран биэрэн сир аһын быйаҥыттан маппатыбыт, киэҥ-нэлэмэн алаастарынан кэбиһиилээх оттор да күүстээхтик кэчигирэстилэр. Ол быыһыгар ОДьКХ салалтата, исписэлиистэрэ, туруу үлэһит уолаттартан таҥыллыбыт өрөмүөннүүр биригээдэ сатабыллаах дьоно саамай үлэлэрин үгэнэ.
Барахсаттар дьиэлэрин-уоттарын, хаһаайыстыбаларын барытын тэҥҥэ тутан үлэлии-хамсыы, тиритэ-хорута сылдьаллар. Өрөмүөн үлэтин тэрээһинэ, барыыта былаана суох хамсаныыны, сыыһа-халты туттууну, былааннаммыт үлэни сарсыҥҥыга хаһаанары сөп диэбэт. Оччотугар эрэ кэлэр кыстыкпытын этэҥҥэ туоруохтаахпыт, дьоммут-сэргэбит, улууспут тэрилтэлэрэ нус-хас үлэлиир, олорор усулуобуйаларын баар гыныахтаахпыт. Ол туһуттан ыраастанар, өрө тардынар, өрөмүөн үлэтэ ыам ыйын 23 күнүттэн Ньукуолун кэнниттэн тута саҕаламмыттара.
Бэс ыйын 1 күнүттэн 2019 сылга көмүскэммит өрөмүөн үлэтин программата саҕаламмыта. Матырыйааллар 80%-ра кыһыҥҥы суолунан тиэллэн аҕалыллыбыттара. Ол курдук от ыйын 16 күнүнээҕи туругунан, оттук сезонугар улуус 21 хочуолунайа, 118 км усталаах сылаас уонна 6,33 км уу ааһар ситимнэрэ бэлэм буоллулар. Капитальнай өрөмүөҥҥэ былааммыт 17 мөл. 354 тыһ. солк. үптэн бүгүҥҥү күҥҥэ 8 мөл. 104 тыһ. солк үлэ ыытылынна.
Күһүн суола суох хаалар кутталлаах нэһилиэктэрбитигэр, Хара Алдаҥҥа 2020 сыл тохсунньутугар, Даайа Амматыгар сэтинньи ыйы туоруур оттуктара тиэллэн тураллар.
Бу сылга уопсайа 24 МВт күүстээх икки саҥа хочуолунай тутуута балаҕан ыйын 1 күнүгэр бүтүөхтээх: Уус Тааттаҕа убаҕас оттуктан таас чоххо көһөрүү, Кыйыга үс эргэ хочуолунай оптимизацияҕа барыахтаахтар. Күүстээх үлэ бэдэрээччиттэринэн бара турар.
Ытык Күөлгэ 1-кы №-дээх, 4№-дээх квартальнай хочуолунайдарга иккилии оһох уларыйда. Дэбдиргэҕэ “Квартальнай”, Ытык Күөлгэ “Мойуона”, ”Тааттастрой”, Боробулга “Школа” котельнайдарыгар былаан быһыытынан сылааһы биэрэр турбалар уларыйдылар, лиистэринэн бүрүлүннүлэр, сылытыннылар. Филиал күүһүнэн былааны таһынан эбии Кыйыга “СДК”, Уолбаҕа “Школа”, Чымынаайыга “Центральнай” хочуолунайдарыгар өрөмүөн үлэлэрэ ыытылыннылар. Хочуолунайдары техническэй уунан хааччыйар инниттэн Ытык Күөлгэ “ЦУБ”, “РПСЭО” хочуолунайдарыгар 573 м уһуннаах уу ситимэ тардылынна.
Олохтоох дьаһалталар кыттыгас үбүлээһиннэринэн сыллата буоларын курдук, сылытар ситимҥэ былаан быһыытынан Ытык Күөлгэ “Олимпийскайга” — 42, ”Тааттастройга” — 7, ”4 №-дээх квартальнайга”- 9, ”Базаҕа” — 9, Чымынаайыга ”Центральнайга” — 15, Харбалаахха ”Центральнайга” – 13 чааһынай ыаллар киин ититэр ситимҥэ холбонуохтара.
Бу үлэлэр барыта анал биригээдэлэр күүстэринэн сөптөөхтүк аттарыллан ыытылла тураллар. Ытык Күөлгэ өрөмүөн үлэтин учаастак маастара үлэҕэ-хамнаска эриллибит, буспут-хаппыт киһибит Н.Н.Слепцов, трассаҕа өрөмүөн үлэтин Сергей Оконешников, водовод үлэтин Егор Григорьев, саҥа трасса тардыллан кэтэх дьиэлэри холбооһуҥҥа үлэлэри саамай эдэр специалиспыт Дьулус Попов сүрүннүүллэр. Өрөмүөн үлэтэ, объектар балаҕан ыйын 1 күнүгэр бүтэллэрин туһугар бары күүһү, өйү-санааны түмэн үлэ күөстүү оргуйар. Бүгүҥҥү туругунан былааннаах үлэ 75% курдук туолла.

Галина АРЫЛАХОВА, Тааттатааҕы ОДьКХ филиалын А.К.Андреев аатынан түмэлин сэбиэдиссэйэ.

Поделиться: