Графиктан хаалыы таҕыста

13

Атырдьах ыйын 27 күнүнээҕи туругунан
Бастакы графаҕа — үүтү туттарыы 8 ыйдаах графига, иккискэ — 8 ый устата төһө үүт туттарыллыбыта (тоннанан), үһүскэ — 8 ыйдаах былааны толоруу бырыһыана.
Таатта 188 186,4 99
Дьохсоҕон 367 302,9 83
Октябрьскай 358 351,9 98
Тыараһа 324,9 342,5 105
Даайа Аммата 114 105,3 92
Дьүлэй 215 248,8 116
Игидэй 206 177,5 86
Орто Амма 330 320,5 97
Амма 368 361,7 98
Уус Амма 231 269,1 116
«Таатта» СПК 2701,9 2666,8 99
Баайаҕа 877 832,5 95
Хара Алдан 83 85,2 103
Алдан 535 407,3 76
Кулаада (Игидэй) 83 77,6 93
Уолба 237 228,1 96
«Баай-Ас» СПК 1815 1632,9 90
Улуус үрдүнэн 4516,9 4299,8 95
Субуоккаттан көстөрүн курдук үүт туттарыытыгар сыл 8 ыйдааҕы графигыттан хаалыы таҕыста, эбэтэр 217,1 тонна үүт ситэ туттарыллыбата. Атырдьах ыйыгар «Баай-Ас» СПК нэһилиэктэрэ үүт тутуутун аччаттылар. Ол түмүгэр Хара Алдан нэһилиэгин олохтоохторо эрэ графигы тутуһан иһэллэр. Оттон Алдан нэһилиэгэр үүт туттарыытыгар улахан доҕолоҥнооһун таҕыста, графиктан 24 бырыһыан хааллылар. Ити курдук Баайаҕа уонна Уолба нэһилиэктэрин хаһаайыстыбалара графика киирбэтилэр. Ол эрээри уолбалар үүт туттарыытын былырыыҥҥыттан биллэрдик үрдэттилэр, былырыын баччаларга 161 тонна үүтү туттарбыт буоллахтарына, быйыл 228,1 тонна үүтү туттаран иһэллэр. Киниттэн ураты нэһилиэктэргэ үүтү туттарыы кээмэйэ намтаата.
«Таатта» СПК нэһилиэктэриттэн 8 ый түмүгүнэн Дьүлэй нэһилиэгин олохтоохторо сыллааҕы былааннарын 4 бырыһыан аһара толорон, билигин үүтү былааны таһынан туттара олороллор. Кинилэр үүтү туттарыы кээмэйин былырыыҥҥыттан 17 бырыһыан үрдэтэн, аҕыс ыйдааҕы графиктарын 16 бырыһыан ааһа түстүлэр. Онон бу нэһилиэккэ быйыл үүтү туттарыыга балаһыанньа тубуста. Эмиэ бу соҕотуопкалыыр тэрилтэттэн Тыараһа нэһилиэгэр график 5, Уус Аммаҕа 16 бырыһыан аһара толорулунна. Оттон Дьохсоҕоҥҥо графиктаах үүт 83, Игидэйгэ 86 эрэ бырыһыанын туттардылар. Ааспыт сылы кытта тэҥнээн көрөр буоллахха Дьүлэй нэһилиэгин сэргэ Таатта, Октябрьскай, Тыараһа, Орто Амма, Уус Амма нэһилиэктэригэр үүтү туттарыы кээмэйэ улаатта. Итинтэн атыттар былырыыҥҥытааҕар аҕыйах үүтү туттаран иһэллэр.
Сыллааҕы былаан туолуутун ылан көрөр буоллахха «Таатта» СПК 74, «Баай-Ас» 71 бырыһыан эрэ толорон иһэллэр, онон улуус үрдүнэн сыллааҕы үүт 73 бырыһыана туттарылынна. Ол эбэтэр сыл мантан хаалбыт ыйдарыгар 1608,1 тонна үүтү туттарар сорук турар. Улахан сорук. Ол туолуута соҕотуопкалыыр тэрилтэлэр, үүт туттарар хаһаайыстыбалар, кэтэх хаһаайыстыбалаах ыаллар, бааһынайдар хайдах-туох дьаһаналларыттан быһаччы тутулуктаах буолуоҕа. Ынахтарын ситэ-хото ыабакка ыытан кэбиһэр түгэннэригэр быйылгы былаан тохтор турукка тиийэн турар. Оттон мантан күһүн биир да ынаҕы уолларбакка, ынахтары улахан тымныы түһүөн иннинэ кыстык хотоҥҥо киллэрэн, төттөрүтүн эбии аһатар түгэннэригэр былааннаах үүт толору кээмэйинэн туттарыллар кыаҕа баар.
ТХУ пресс-киинэ.

Поделиться: