Оҕолоох дьоҥҥо судаарыстыба көмөтө элбэх

11

Дойду уонна өрөспүүбүлүкэ салалталара демография боппуруостарыгар улахан болҕомтолорун уураллар. Ол биир сүрүн туоһутунан оҕолоох ыалларга оҥоһуллар араас көрүҥнээх көмөлөр буолаллар. Туох-ханнык көмөлөр оҥоһуллалларын оҕолоох ыаллар үчүгэйдик билэр буолуохтаахтар. Ол да буоллар кинилэри сэргэ саҥа ыал буолаары сылдьар эдэр дьон интэриэһин тардар туһуттан мантан аллара оҕолоох ыалларга оҥоһуллар көмө көрүҥнэрин билиһиннэрэри наадалааҕынан ааҕабыт.
Бастатан туран, өрөспүүбүлүкэттэн оҕолоох ыалларга оҕо ахсын ый аайы пособие төлөнөр. Бу пособие кээмэйэ ыал дохуотун кээмэйиттэн быһаччы тутулуктаах. Ол курдук дьиэ кэргэн хас биирдии киһитигэр нэһиилэ тиийинэн олоруу алын кээмэйин 30 бырыһыаныгар тиийбэт дохуоттаах буоллаҕына, хас биирдии оҕотугар ый аайы, 1,7 оройуоннааҕы коэффициенынан ааҕан 1400, оттон орто дохуот кээмэйэ 30 бырыһыантан элбэх буоллаҕына 1076 солк. пособие бэриллэр. Итини таһынан 3 уонна онтон элбэх оҕолоох ыалга оскуолаҕа үөрэнэр оҕотун ахсын сылга биирдэ үөрэх тээбиринин, оскуолаҕа кэтэр таҥаһын-сабын уо.д.а. атыылаһарыгар диэн 3523 солк. биир кэмнээх көмө оҥоһуллар. Ыалга үһүс оҕо төрөөтөҕүнэ 139716,69 солк. кээмэйдээх өрөспүүбүлүкэтээҕи ийэ капитала төлөнөр. Оттон эдэр ыалга бастакы оҕолоро төрөөтөҕүнэ 7048 солк. биир кэмнээх компенсация бэриллэр.
Быйылгыттан, ол эбэтэр 2019 с. тохсунньу 1 күнүттэн, элбэх оҕолоох ыалларга өрөспүүбүлүкэ өттүттэн оҥоһуллар көмө арааһа өссө эбиллэн биэрдэ. Ол курдук ыалга иккис оҕо төрөөтөҕүнэ, федеральнай ийэ капиталын таһынан, 135907,8 солк. региональнай ийэ капитала төлөнөр буолла. Оттон бастакы оҕолорун төрөппүт, эбэтэр оҕо иитэ ылбыт ыалга 33812 солк. биир кэмнээх пособие төлөнөр. Ону ааһан элбэх оҕолоох ыаллар кэккэлэригэр киирбит дьиэ кэргэттэргэ үһүс оҕолоро төрөөтөҕүнэ 3 сааһын туолуор диэри ый ахсын 16906 солк. үбүнэн көмө баар буолла. Манна быһааран этэр буоллахха 3 уонна онтон элбэх оҕолоох, ол иһигэр анал үөрэх кыһатыгар иһирдьэ үөрэнэ сылдьар, 23 сааһын туола илик оҕолоох дьиэ кэргэттэр элбэх оҕолоох ыал ахсааныгар киирэллэр. Кинилэргэ үһүс оҕолоро төрөөтөҕүнэ анал бэлиэ уонна дастабырыанньа туттарыллар.
Иккиһинэн, оҕолоох ыалларга өрөспүүбүлүкэттэн оҥоһуллар үөһэ ахтыллыбыт көмөлөрү таһынан федеральнай бюджеттэн кэлэр көмөлөр бааллар. Ол курдук ийэ бастакы оҕото 1,5 сааһын туолуор диэри үлэлээбэккэ оҕотун көрөн олорор буоллаҕына ый ахсын 4588,43 солк., иккис уонна онтон элбэх оҕону көрөн үлэлээбэккэ олорор ийэҕэ ый ахсын 9176,85 солк. пособие бэриллэр. Оттон төрөппүттэр иккиэн үлэлээбэккэ олорон оҕолоннохторуна 24471,62 солк. биир кэмнээх пособие ананар. Ыал аҕата армияҕа сулууспалыы сылдьар буоллаҕына оҕотугар ый ахсын 16608,58 солк. пособие төлөнөр, оттон байыаннай сулууспаҕа ыҥырыллан барбыт аҕа кэргэнэ хат хаалбыт буоллаҕына 38753,36 солк. биир кэмнээх пособие ананар. 2018 с. тохсунньу 1 күнүттэн ыал бастакы оҕото төрөөтөҕүнэ федеральнай бюджеттэн ый ахсын 16906 солк. төлөбүр олохтоммута. Онон улуус оҕолоох ыалларын судаарыстыба оҥорор көмөтүн туһаналларыгар ыҥырабыт.
А.БАШАРИНА, улуустааҕы социальнай көмүскэл управлениетын специалиһа.

Поделиться: