Оскуолаларга «Үүнүү-сайдыы тирэҕэ» («Точка роста») кииннэр үлэлиэхтэрэ

7

 

 

Национальнай бырайыак: үөрэхтээһин
«Үөрэхтээһин» национальнай бырайыагы олоххо киллэрии чэрчитинэн улуус икки оскуолатыгар: А.И.Софронов-Алампа аатынан Ытык Күөл 1-кы №-дээх уонна Э.К.Пекарскай аатынан Игидэй орто оскуолаларыгар балаҕан ыйын 20 күнүттэн сыыппара уонна гуманитарнай хайысхалаах «Үүнүү-сайдыы тирэҕэ» кииннэр аһыллан үлэлиэхтэрэ. Бу кииннэри тэрийии сыала-соруга тугуй уонна хайдах быһыылаахтык үлэлиэхтэрэй?
Бастатан туран, бу тирэх кииннэр үөрэнээччилэр үрдүк хаачыстыбалаах үөрэҕи ылалларыгар саҥа кыахтары арыйыахтара, оҕолор аныгы сыыппара технологияларын баһылыылларыгар, гуманитарнай билиини-көрүүнү ылалларыгар көмөлөһүөхтэрэ.
Иккиһинэн, киин үөрэх-иитии үлэтин саҥа ньымаларын, аныгы оборудованиелары туһанан, үөрэнээччилэри 100 бырыһыан «Технология», «Информатика», «Олох-дьаһах куттала суох буолуутун төрүттэрэ» предметтэринэн хабары хааччыйыахтаах. Ону таһынан оскуола оҕолоро уруок тас өттүнэн, ол иһигэр ыраахтан олорон үөрэтэр формалары уонна сетинэн сибээһи туһанан сыыппара, естественнэй-научнай, техническэй, гуманитарнай хайысхалаах уопсай үөрэхтээһин эбии программаларынан дьарыктанар кыахтаналлар. Бу модель оҕолор, педагогтар, төрөппүттэр культура уопсай компетенциятын, сыыппара грамотнаһын, саахымат үөрэҕин, бырайыактыыр үлэни, айар, социальнай өттүнэн бэйэлэрин толкуйдарын олоххо киллэрэр общественнай эйгэлэрин функциятын толорор.
«Үүнүү-сайдыы тирэҕэ» программа олоххо киирэр буолбутунан сибээстээн атырдьах ыйын 12-23 күннэригэр өрөспүүбүлүкэтээҕи «Кванториум» Оҕо технопаркатыгар «Технология» предметин салаатыгар тыа сирин оскуолаларын учууталларыгар аналлаах үөрэтэр сессия буолан ааспыта. Онно өрөспүүбүлүкэттэн уонна Магадан уобалаһыттан 80-ча учуутал «Современные проектные методы развития высокотехнологичных предметных навыков обучающихся предметной области «Технология» программа сүнньүнэн үөрэннэ. Бу сессияҕа Ытык Күөл 1-кы №-дээх оскуолатыттан Н.П.Степанов баран, үөрэнэн кэллэ.
Учууталлар сэттэ: роботтехника, промышленнай дизайн, IТ, хайтек, виртуальнай уонна олоҕурбут баар чахчы, аэротехнология, геоинформационнай технологиялар хайысханан үөрэннилэр. Дьарыктары Дьокуускай куораттааҕы «Кванториум» оҕо технопаркатын наставниктара ыыттылар. Сессия кыттыылаахтара бука бары бырайыактыыр методика толору курсун үөрэттилэр, бэйэлэрин бырайыактарын ырытан оҥорон, экспертэр иннилэригэр көмүскээтилэр. Бу үөрэҕи ситиһиилээхтик ааспыт учууталларга барыларыгар квалификацияларын үрдэппиттэрин туоһулуур дастабырыанньалар туттарылыннылар.
Бу сессияҕа сылдьыбыт учууталлар бары да улаханнык астыннылар. Ол курдук Тулагытааҕы орто оскуола учуутала С.Гуляева: «Кванториум» оҕо технопаркатын хамаандатыгар улахан махтал. Бу биэс күн иһигэр олус элбэх саҥаны биллим. Бырайыактыыр үлэ, үлэҕэ-хамнаска наадалаах специалистары иитэн таһаарар туһуттан эбии үөрэхтээһиҥҥэ ханнык хайысханы тутуһар ордугун туһунан саҥа көрүүлэр үөскээтилэр».
9-с №-дээх орто оскуола учуутала Е.Петрова: «Барытыттан олус астынныбыт! Тус бэйэм курс темаларыттан, практическай дьарыктарыттан олус элбэҕи туһанным. Наһаа элбэх сонуну биллибит, матырыйаал ис хоһоонун олус үчүгэйдик тиэртилэр. Наставниктарга махтал!»
Амма 1-кы №-дээх орто оскуолатын учуутала Л.Окороков: «Наһаа интэриэһинэй курстарга сырыттым. Бэрт кылгас кэм иһигэр олус элбэх информацияны ыллым. «Кванториум» коллективын үлэтигэр ситиһиилэри баҕарабын».
Биһиги оскуолабытыгар «Үүнүү-сайдыы» киинэ аһылларынан «Олох-дьаһах куттала суох буолуутун төрүттэрин», «Технология» уонна саахымат, медиазона кабинеттарын оҥорторо сылдьабыт. Ону таһынан бу кииҥҥэ эбии үөрэхтээһин программатынан уруок таһынан дьарыктар ыытыллыахтара. Онон кииҥҥэ олох-дьаһах куттала суох буолуутун төрүттэрин, технологияны, информатиканы үөрэтэр, медиазонаны үлэлэтэр, робототехникаҕа, ракетомоделирование, 3Д-моделирование дьарыктарын ыытар 7 учуутал баар буолуоҕа. Тирэх кииммит материальнай-техническэй базатын бөҕөргөтөрбүтүгэр анаан 1,6 мөл. солк. көрүлүннэ. Ити үбүнэн үөрэнэр кабинеттар оборудованиеларын ылыахпыт, олох-дьаһах куттала суох буолуутун төрүттэрин кабинетыгар тренажердар, кииммитигэр 3Д принтер, квадрокоптер компьютернай техника кэлиэхтэрэ.
Уопсайынан, «Үүнүү-сайдыы тирэҕэ» бырайыак оскуолалар материальнай-техническэй базаларын саҥардар уонна кэҥэтэр кыаҕы биэрэр. Бу үлэ олоххо киириитэ кэнэҕэһин тыа сирин, киинтэн ыраах кырыы сытар оскуолаларын оҕолоро аныгы сыыппара технологияларын баһылыылларыгар, гуманитарнай хайысханан бэйэлэрин билиилэрин-көрүүлэрин кэҥэтинэллэригэр улахан көмөлөөх буолуоҕа.

И.БУДИКИН,
Ытык Күөл 1-кы №-дээх орто оскуолатын директорын информатизацияҕа солбуйааччы, «Үүнүү-сайдыы тирэҕэ» киин салайааччыта.

Поделиться: