Олохтоохтор общественнай сиргэ мааскалаах сылдьыҥ

24

Елена Алексеевна ТАРАСОВА, СӨ Роспотребнадзорун управлениетын Тааттатааҕы салаатын начальнига:
— Бүгүҥҥү күннээҕи туругунан улууспутугар короновирус инфекцията бэлиэтэнэ илик. Бу сыстыганнаах дьаҥы утары улуустааҕы штаб тэриллэн үлэлии олорор, күн аайы көрсөн мунньахтыыбыт. Билигин нэһилиэнньэ олохтоохторугар өйдөтөр үлэ барар. Инфекцияны биһиэхэ улууспутугар кэлэр дьон тарҕатыахтарын сөп. Ол инниттэн Москваттан, омук сириттэн кэлбит дьону испииһэктээн кэтии олоробут. Дьон-сэргэ бэйэ бэйэтигэр харыстабыллаахтык сыһыаннаһыан наада.
Иккис өттүнэн, сэрэхэдитэр өттүнэн оскуола оҕолоругар төһө да карантин биллэрбиппит үрдүнэн уулуссаҕа, оннооҕор маҕаһыыҥҥа сылдьар түгэннэрэ тахсар. Нэһилиэнньэ сорох олохтоохторо өйдөтүү үлэтин истибэттэр, тутуспат түгэннэрэ тахса турар. Хас биирдии тэрилтэҕэ, маҕаһыыҥҥа киирэр дьон мааскалаах сылдьыҥ, дьону харыстаан диэн бэлиэтиэхпин баҕарабын. Тэрилтэлэр бэйэлэрин истэригэр бирикээс таһааран үлэлээн эрэллэр, киирэр ааҥҥа мааскалаах сылдьыҥ диэн биллэрии хайаан да баар буолуохтааҕын ирдиибит. Күҥҥэ иккитэ хлордаах уунан тэрилтэни сууйуохха наада. Ыраастык, чэбэрдик туттуохха, илиини күҥҥэ хаста да сууна сылдьыахха.
Штаб үлэһиттэрэ күҥҥэ иккитэ рейдэҕэ тахсан маҕаһыыннары, дьон тоҕуоруһар сирдэрин көрөбүт. Манан түмүк оҥоробут. Өскөтүн атыыһыттар хаттаан сэрэтии ылар буоллахтарына, бэл маҕаһыыны сабар турукка киириэхпит. Атыылааччы мааскалаах буолуохтаах. Олохтоохтор улахан кыһалҕата суох элбэх киһи сылдьар сирдэрин тумна сылдьын диэн этиэхпин баҕарабын. Өссө биирдэ хатылаан эттэхпинэ – мааска режимин тутуһун. Манна даҕатан эттэххэ, инфекцияны үгүстүк оҕолор тарҕатыахтарын сөп, бэйэлэрэ ыалдьыбакка сылдьан. Онно манна көҥүл сылдьан ыарыы ыһылларыгар усулуобуйа тэрийэллэр. Ол иһин мааскалаах сылдьыахха наада. Биир сүрүн кыһалҕабытынан уулуспутугар мааска тиийбэт. Биирдиилээн предпринимателлэр, оскуолалар мааска тигэн эрэллэр. Кутталлаах дьаҥы кытта үлэ барар турар, күн аайы сурук кэлэр маны кытта үлэлиибит. Нэһилиэк олохтоохторугар өссө биирдэ этэбин мааскалаах сылдьыҥ, бэйэ бэйэни харыстаһыахха, тус гигиенаны тутуһуохха.

Тааттыныскай нэһилиэккэ ҕам саастаахтарга волонтердар көмөлөһүөхтэрэ Ольга ТАРАБУКИНА, “Таатта нэһилиэгэ” МО кыл. специалиһэ:


— Аан дойду үрдүнэн буола турар балаһыанньанан, ыарыы тарҕамматын туһугар өрөспүүбүлүкэ үрдүнэн сэрэтии үлэтэ күүскэ ыытыллар. Ытык Күөл Таатта улууһун киинэ уонна саамай элбэх ахсааннаах нэһилиэгэ буолар. Манна 7 тыһ. тахса киһи олорор, ол иһигэр 49 тыыл ветерана, 5 сэрии кыттыылааҕын огдообото, 133 сэрии сылын оҕолоро бааллар.
Нэһилиэкпитигэр дьоҥҥо-сэргэҕэ өйдөтүү, ону тэҥэ профилактика, дезинфекция курдук үлэлэр күннэтэ ыытыллаллар. Культурнай маасссабай тэрээһиннэр бука бары тохтоон тураллар, үгүс тэрилтэлэр дьиэттэн олорон үлэлииллэр, оскуола оҕолоро сааскы каникулга эрдэ баран, дьиэлэригэр олороллор. Күн ахсын оҕолор уулуссаҕа, маҕаһыыннарга, общественнай миэстэлэргэ сылдьыбаттарын хонтуруоллуур сыаллаах рейдэлэр ыытыллаллар. 60-нарыттан үөһэ саастаах, көмөлөһөр дьоно-сэргэтэ, оҕото-уруута суох аҕам саастаахтарбытыгар анаан волонтердар үлэлииллэр. Манна күннээҕи туттуллар мал-сал, эмп, ас-үөл ыллаттарыан баҕалаах кырдьаҕастар, доруобуйаларынан хааччахтаах дьон эрийэн сакаас биэрэллэр. Волонтердар аадырыска этиллибит сакааһы илдьэн биэрэллэр. Нэһилиэккэ мааска тиийбэтинэн сибээстээн «Уйгу» маҕаһыын, «Сарыал» киин үлэһиттэрэ уонна биирдиилээн дьон тигэн атыылаан эрэллэр. Онтон Мавра Беркина волонтердарга босхо тигэн биэрэр.
Ону таһынан, уопсай дьиэлэр подъезтарын дезинфекциялыыр үлэ ыытылынна. Маны тэҥэ күн аайы күҥҥэ иккитэ тэрилтэ, түөлбэ салайааччыларыттан тас дойдуттан, Россия куораттарыттан кэлии-барыы баарын-суоҕун ыйытан, бэлиэтэнэбит уонна улуус оперативнай штабыгар отчуоттуубут. Тас дойдуттан уонна Россия куораттарыттан кэлбит дьону кытта киин балыыһа биирдиилээн өйдөтүү үлэтин ыытар.
С.ХАЛГАЕВА.

 

 

 

Поделиться: