Эрэллээх хардыы — Харбалаах уйгута!

22

Айал Васильевич Бурнашев 1982 сыллаахха Харбалаах бөһүөлэгэр төрөөбүтэ.
2000 с. Харбалаах орто оскуолатын бүтэрбитэ, үөрэнэ сылдьан олимпиада кыайыылааҕа буолан Нерюнгри куоракка ТИ ЯГУ филиалыгар киирбитэ.
2006 с. инженер-строитель идэтин ылбыта.
2000-2008 с.с. ОДЬКХ Тааттатааҕы филиалыгар бастакы механизированнай квартальнай хочуолунай тутуутуттан саҕалаан, үлэҕэ киллэрсэн, онно маастарынан үлэлээбитэ.
2008-2013 с.с. “Тааттыныскай нэһилиэк” дьаһалтатыгар тутуу, благоустройство, ЖКХ хайысхаларыгар кылаабынай специалиһынан үлэлээбитэ.
2010-2014 с.с. Россия президенын сулууспатын иһинэн норуот хаһаайыстыбатын уонна государственнай сулууспатын Академиятын государственнай уонна муниципальнай салайыы факультетын бүтэрбитэ.
2013 сылтан ООО «Коммунальнай Сервис” генеральнай директорынан үлэлиир.
Тааттыныскай нэһилиэк «Бастыҥ эдэр специалист” номинация кыайыылааҕа, олохтоох дьаһалта Грамоталарынан, Махтал суруктарынан наҕараадаламмыта.
Кэргэннээх, оҕолоох.
Харбалаах салгыы сайдыытыгар туһуламмыт программам чэрчитинэн киирбит нэһилиэк туруорсар ыйытыктарыгар тус санааларым.
Тыа хаһаайыстыбатын сайдыыта кэлимсэ барыахтаах. Сүрүн кыһалҕалар нэһилиэнньэ көһүүтэ, кыра хамнаһа, үрдүк квалификациялаах специалистар аҕыйахтара, үлэтэ суох буолуу барыбытын долгутар. Олох сайдыытыттан хаалсыа суохтаахпыт, форсайт-сессиялары тэрийэн араас көлүөнэ дьон санаатын түмэр, истэр, ырытар көдьүүстээх. Баар ресурсалары, саҥа технологиялары таба туһанан тиэргэн хаһаайыстыбалара сайдалларыгар көмө оҥоруохтаахпыт.
Тутуу-нэһилиэк сайдыыта. Нэһилиэк социальнай объектарын, олорор дьиэлэрин тутууга уонна ремоннуур үлэни ыытыыга, суол оҥоһуутугар сүрүн болҕомтобун уурабын. Ол курдук РФ Правительствота “Тыа сирин биир кэлим сайдыыта» диэн федеральнай государственнай программата тыа сирэ тупсарыгар элбэх кыаҕы биэрдэ, бу туһуламмыт программанан уопсай дьиэлэри федеральнай программанан саҥа таас дьиэҕэ көһөрүөхтээхпит.
Харбалаах эдэр дьон олохсуйар сирэ. Нэһилиэк сайдыыта эдэр дьонтон турарын бары өйдүүбүт. Бэйэм үлэбэр-хамнаспар эдэр дьону өйүүргэ сыал-сорук туруорабын. Үгүс ыччат санаатын иһиттим, туруорсар кыһалҕалаах ыйытыктарыгар болҕомто ууран талааннаах оҕолору, ыччаттары бары өттүттэн өйөөн, ыччат дойдутугар олохсуйан үлэлииригэр сөптөөх усулуобуйаны тэрийэр сыалтан сүрүн соруктары туруорабын:
-ыччаттар бэйэ дьыалатын арынан, дьоҕус тэрилтэ тэринэллэригэр юридическай правовой көмөнү оҥоруу;
-дьиэ-уот тутталларыгар анал бырагырааммаларга киирэллэригэр өйөөһүн;
-эдэр специалистар квалификацияларын үрдэтэллэригэр көмөлөһүү;
-эдэр ыччат спорт араас көрүҥнэринэн дьарыктанарыгар усулуобуйа тэрийии хайысхаларыгар бииргэ үлэлиэхпит.
Урбаан сайдыыта-үлэ миэстэтин таһаарыыга хамсааһын. Инникитин ханнык саҥа хайысхалары арыйыахха сөбүн үөрэтэн, дьоммут-сэргэбит дьарыктаах буолуутугар күүс-көмө буолуохпут, баар кыһалҕалары туоратар сыалтан бизнес-киин арыйан үлэ миэстэтин таһаарарга үлэлэһиэм.
Биһиги умнуо суохтаахпыт аҕа көлүөнэ Харбалаахпыт сайдыытыгар турууласпыт үлэтин-хамнаһын. Тапталлаах Харбалаахпыт бэйэтэ дириҥ историялаах, ураты олохтоох-дьаһахтаах. Өрөспүүбүлүкэҕэ, улууска киэн тутта ааттыыр дьоннооҕунан аатырар. Үүнэр көлүөнэҕэ төрөөбүт дойдуларын туһунан кэнэҕэс үйэлэргэ билэ, ытыктыы сылдьалларын инниттэн Харбалааҕы төрүттээбит Иван Васильевич Николаев скверигэр бастакы тутааччылар стелаларын оҥоруохпут. Уулуссаларга иҥэриллибит киэн тутта ааттыыр дьоммут аатын үйэтитиигэ салгыы үлэлиэхпит.
Социальнай эйгэҕэ. Туһааннаах дьаһаллары ылынан, нэһилиэнньэ кыаммат араҥатыгар — кырдьаҕастарга, доруобуйатынан хааччахтаах дьоҥҥо, элбэх оҕолоох, кыра дохуоттаах дьиэ кэргэҥҥэ от –мас тиэйиитигэр, иһэр уунан хааччыйыыга өйөбүлү оҥоруу. Волонтерскай хамсааһыны тэрийии, Граннарга кыттан үбүлэнии.
Сибээс сайдыыта-олох хардыыта.Инновационнай, цифровой сайдыы тэтимирэр, хас биирдии киһи, тэрилтэ салайааччылара, үлэһиттэрэ сатаан туһаналларыгар тоҕоостоох кэм кэллэ. Олохтоох бэйэни салайыныы.Олохтоох дьаһалта үлэһиттэригэр салгыы үлэлииллэригэр усулуобуйаны тэрийии, кинилэр квалификацияларын үрдэтэллэригэр көмө оҥоруу. Олохтоох бэйэни салайыныы уорганнарын үлэтин, үп-харчы хамсааһынын туһунан нэһилиэк олохтоохторугар олохтоох дьаһалта сайтын нөҥүө аһаҕастык кэмигэр иһитиннэрии.

Ытыктабыллаах биир  дойдулаахтарым!

Харбалаахпытын төрүттээбит, бастакы салайааччы Иван Васильевич Николаев уонна биһиги ытыктыыр бастакы тутааччыларбыт ыра санааларын толорон тапталлаах Харбалаахпыт салгыы сайдарыгар бука бары биир санаанан сомоҕолоһуоххайыҥ! Балаҕан ыйын 13 күнүгэр төрөөбүт дойдубут туруктаах буоларын өйөөн миэхэ куоласкытын биэриххит диэн эрэнэбин!

Ытыктабыллаах Харбалаах нэһилиэгин олохтоохторо!

Балаҕан ыйын 13 күнүгэр буолаары турар нэһилиэк аҕа баһылыгын талар быһаарыылаах быыбарга Биир ньыгыл баартыйаттан турбут Айал Бурнашев кандидатуратын өйүүргүтүгэр ыҥырабын.
Олох-дьаһах коммунальнай хаһаайыстыба үлэтиттэн хас биирдии нэһилиэк быһаччы тутулуктаах. Социальнай объектарга, чааһынай ыалларга киин ититэр ситим киириитэ күннээҕи олохпутун лаппа чэпчэтэр, чох-мас атыылаһыыттан, түүннэри-күннэри оһох айаҕын маныыр ыарахан үлэттэн босхолуур. Мин бу күннэргэ Таатта улууһун бөһүөлэктэрин кэрийэн дьону-сэргэни кытары көрсөн, хочуолунайдар туруктарын бэрэбиэркэлээн, билсэн кэллим. Харбалаахха Теплица уонна үрэх уҥуоргу микрорайоҥҥа квартальнай хочуолунайы туттаран киин ититэр тиһиги олохтоохторго тиэрдии сүрүн сорукпут буолар. Үбүлээһин араас ньымаларын туттан бары күүспүтүн түмэн, бииргэ ситимнээхтик үлэлиирбит ирдэнэр.
Маныаха праймеризка кыайбыт, Биир ньыгыл баартыйа эрэнэн туруорбут кандидатуратын өйүөххүт, талыаххыт диэн эрэнэбин.
Олох-дьаһах коммунальнай хаһаайыстыба Тааттатааҕы филиалын директора Дмитрий Дмитриевич ПАВЛОВ.

Хоһуун үлэһит дьоннордоох  Харбалаах бар дьоно!

Нэһилиэк аҕа баһылыгын талар эппиэтинэстээх кэммит чугаһаата. Харбалаах биһиги улууспутугар собус соҕотох промышленнай нэһилиэкпит буоларынан улуус социальнай-экономическай сайдыытыгар лаппа улахан суолталаах. Төлөн чох разреһа республика таһымыгар бастыҥ үлэтинэн аатырар. Чоҕун саппааһа инники сайдыыга, тэрилтэ кыаҕын улаатыннарарыгар кыахтары биэрэр. Онон инники сайдар кэскилэ далааһыннаах. Маныаха былаас бары үктэллэрэ биир ситимнээхтик үлэлииллэрэ, баһылыыр-көһүлүүр Биир ньыгыл Россия баартыйа инники күөҥҥэ тахсара туохтааҕар да ирдэнэр. Кистэл буолбатах республика бүддьүөтүн тыырыы биһиги үрдүкү салалтабыт боломуочуйата буолар. Биһиги инники сайдыыбыт үптэн-харчыттан тутулуктааҕа саарбахтаныллыбат. Биир ньыгыл Россия эрэнэн туруорбут, праймеризка кыайыыны ылбыт эдэр, эрчимнээх Айал Бурнашевка куоласкытын биэрэгитигэр ыҥырабын.
Хас биирдии олохтоох киһи буолаары турар быыбарга сыта-тура толкуйдаан сөптөөх быһаарыныы ыларыгар эрэлим улахан.
АО Тааттаавтодор генеральнай  директора Уйбаан БОЧОНИН.

Матырыйаал кандидат быыбар иннинээҕи фондатыттан төлөннө.

Поделиться: