Баһылыктар быыбар кэннэ бастакы сүбэлэрэ

21

Балаҕан ыйын 15 күнүгэр муниципальнай тэриллиилэр саҥа быыбардаммыт, норуот итэҕэлин ылбыт баһылыктарын улуус баһылыга Михаил Соров эҕэрдэлээтэ, инники үлэлэригэр ситиһиилэри баҕарда.
Нэһилиэктэр баһылыктарыгар улуус баһылыгын экономикаҕа боппуруостарыгар солбуйааччы А.Боппосов федеральнай, өрөспүүбүлүкэтээҕи бырагырааммалар, культура управлениетын салайааччыта Г.Вырдылин культура уонна спорт үлэлэригэр инники соруктар, тыа хаһаайыстыбатын управлениетын кылаабынай зоотехнига Г.Таппыров тыа хаһаайыстыбатыгар көрүллэр бырагырааммалар, социальнай харалта салайааччыта М.Тарасов нэһилиэнньэ кыаммат араҥатыгар туһаайыллыбыт судаарыстыба көмөтүн тустарынан билиһиннэрдилэр.
Улуус баһылыгын сүбэ мунньаҕын иккис боппуруоһунан улуус элбэх нэһилиэктэринэн тэнийбит баһаар кутталын тула буолла. Муниципальнай тэриллиилэр баһылыктарын уонна Тааттатааҕы лесничество начальнига М.Назаров иһитиннэриилэринэн сыаналаатахха, баһаар куттала улууска улааппыт. Ордук кутталлааҕынан Дэбдиргэҕэ Ньимиидэ үрэҕэр баһаар бара турара диэн буолла. Бу 37 нүөмэрдээх баһаарга билигин 11 киһи үлэлии сылдьар, эбии Уолбаттан 25, Дэбдиргэттэн 50, ГАУ «Лесавиа» 7 киһи, өссө бүгүн Боробултан 20 киһи тахсыахтаах. Бу объекка 10 трактор үлэлиир.
Тыараһаҕа 33 нүөмэрдээх баһаарга 135 гаа ойуур сир уонна 135 гаа хонуу сир умайа турар. Уопсайа 31 киһи үлэлии сылдьаллар. Олор истэригэр 13 парашютнай сулууспа үлэһиттэрэ, 3 десантнай – парашютнай сулууспа уонна олохтоох нэһилиэнньэттэн 20 киһи баһаары умуруорууга түүннэри–күнүстэри үлэлииллэр. Бэҕэһээ 6 килэмиэтир сир уот киирбэт гына төгүрүтүлүннэ. 2 ДТ-75 тыраахтардар үлэлииллэр. Маны таһынан баһаар куттала атын нэһилиэктэргэ эмиэ суоһуур: Боробулга, Чөркөөххө, Хара Алдаҥҥа, Уус Аммаҕа, Уолбаҕа. Бу нэһилиэктэртэн эмиэ биригээдэлэр тахсан үлэлии сылдьаллар, нэһилиэктэр дьаһалталара астарын-үөллэрин, горючайдарын, техникаларын быһаараллар.
Хара Алдаҥҥа, Уус Аммаҕа ОППТ сирэ умайар дииллэрин, улахан умуруоруу тэриллибэтин олохтоохтор сөпсөспөттөрүн биллэрэллэр диэн баһылыктар тиэртилэр. Дьон хаарыан сирдэрэ, тыалара, толоонноро күл-көмөр буоларын көрөн олус хараасталлар. Былырыын умайбыт хайаҕа сир аһа хайдах эбитэ буоллар диэн тахсан баран, хаарыан баай, аһатар-сиэтэр, сир ирэрин тутар тыабыт барахсан кумаҕынан-буорунан көрө сытарын, тиит, бэс мастар төрдүлэрэ бүтүннүү уунан бычалыйа сыталларын көрөн киһи эрэ хараастыах хартыыната буоллаҕа эбээт.
Баһаары умулларыыга идэтийбит баһаарынай сулууспаттан саҕалаан, чааһынай дьоннор, олохтоох улуус, нэһилиэк дьаһалталара күүстэрин холбоон, салгыы үлэни хайдах былаанныыры, туох-ханнык күүстэри холбууру, түмэри сүбэлэһии буолла. Ол курдук, лесничэй М.Назаров бигэргэтиитинэн, улуус баһылыга Михаил Соров үгүс кэпсэтиини ыытан, парашютистар баһаары умуллара кэлэллэрэ билиннэ. Сорох нэһилиэктэр горючайга наадыйыыларын «Тааттаавтодор» (салайааччы И.И.Бочонин), «Төлөн» (салайааччы П.Д.Рахлеев) тэрилтэлэр көмөлөһүөх буоллулар.МТ баһылыктара тиэрдибиттэриттэн иһиттэххэ сорох ыаллар алталыы, үстүү кэбиһиилээх отторо уокка былдьаммыттар, үүтээннэр умайыылара эмиэ тахсыталаабыт чинчилээх. Бу уһун сайыны быһа үрүҥ-хара көлөһүннэрин түһэрэн, сыралаһан оттообут отторо күппүлүү уокка былдьанара диэн тустаахтарга ыарахан түгэн. Маннык түбэлтэҕэ хоромньуларын уйуналларыгар тустаах дьоҥҥо туох эмит көмө хайа эмэ өттүттэн баар буолара дуу диэн ыйыталаһарга соруннум. Онуоха улуустааҕы тыа хаһаайыстыбатын управлениетын кылаабынай зоотехнига Григорий Таппыров хоромньуну төнүннэрии боппуруоһугар тыа хаһаайыстыбатын министиэристибэтигэр үлэлэһэ, хоромньуну чуолкайдыы сылдьабыт диэн эппиэттээтэ.
Онон улууска билигин даҕаны баһаар куттала уҕарыы илик, умуруорууга уопсай күүһүнэн, сүбэнэн быһаарыы үтүө эрэ түмүктэри аҕаллын диибит.

Анна ПОСЕЛЬСКАЯ.

Поделиться: